29-aprel kuni O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mitaga Quvayt Davlati Milliy kengashi do‘stlik qo‘mitasi raisi Saud Nashmi al-Xorijiy boshchiligidagi delegatsiya tashrif buyurdi. Bu haqda qo‘mita rasmiy saytida xabar berildi.
Mehmonlarni Din ishlari bo‘yicha qo‘mita raisi O. Yusupov qabul qildi.
O. Yusupov mehmonlarni O‘zbekistonga tashrifi bilan qutlab, Din ishlari bo‘yicha qo‘mita faoliyati, Respublikadagi diniy vaziyat, amalga oshirilayotgan islohotlar xususida qisqacha ma’lumot berdi.
Saud Nashmi al-Xorijiy O‘zbekistonga tashrifidan juda mamnun ekanini ma’lum qilib, Quvayt xalqi, hukumati hamda Milliy kengashi nomidan O‘zbekistonga taklif etilganligi uchun minnatdorchilik bildirdi. Mehmon Quvayt Davlatining O‘zbekiston mustaqilligini tan olgan birinchi davlatlardan bo‘lganligini ma’lum qilib, o‘zaro munosabatlarga yuqori e’tibor bilan qaralishini ta’kidlab o‘tdi.
Mehmon Quvaytdagi ko‘pgina jamg‘armalar O‘zbekiston bilan aloqada ekanligini ma’lum qilib, ko‘p yillardan beri O‘zbekistonda faoliyat olib borayotgan Quvayt xalqaro xayriya jamg‘armasini misol qilib ko‘rsatdi. So‘zining oxirida Saud Nashmi al-Xorijiy mazkur tashrifdan asosiy maqsad ham aynan ikki davlat o‘rtasidagi aloqalarni yanada mustahkamlashga qaratilganligini ma’lum qildi.
O. Yusupov bildirilgan fikrlar uchun minnatdorchilik bildirib, diniy sohada ham Quvayt Davlatining Toshkent shahridagi elchixonasi bilan doimiy muloqotda bo‘linib kelinayotganligini ta’kidlab o‘tdi.
Uchrashuv so‘ngida ikki tomon barqaror davom etayotgan hamkorlik yo‘lini yanada mustahkamlash va rivojlantirishga tayyor ekanligini ta’kidladi.
Uchrashuv samimiy va do‘stona muhitda o‘tdi.
Izoh (0)