O‘zbekiston investitsiyalar, sanoat va savdo vaziri Laziz Qudratov Osiyo infratuzilmaviy investitsiyalar banki vitse-prezidenti Konstantin Limitovskiy bilan uchrashdi. Bu haqda vazirlik matbuot xizmati xabar berdi.
Qayd etilishicha, tomonlar energetika, taʼlim, sog‘liqni saqlash va suv taʼminoti sohalarida istiqbolli loyihalarni hayotga tatbiq qilish jarayoni hamda 2024-2026-yillarga mo‘ljallangan hamkorlik dasturiga kiritilgan yangi tashabbuslarni birgalikda amalga oshirish istiqbollarini ko‘rib chiqqan.
Dastur doirasida yashil energetika, suv taʼminoti, avtomobil yo‘llarini rekonstruksiya qilish va infratuzilmaviy rivojlanish kabi jami 2,58 milliard dollarlik 12 ta loyihani moliyalashtirilishi nazarda tutilgan.
Sentyabr oyida Samarqand shahrida bo‘lib o‘tadigan AIIB Boshqaruvchilar Kengashining 9 yillik yig‘ilishiga tayyorgarlikning borishini muhokama qilishga alohida eʼtibor qaratilgan.
Hozirgi kunda bank ishtirokida davlat byudjetini qo‘llab-quvvatlash, suv taʼminoti va kanalizatsiya, energetika, kichik biznes va xususiy tadbirkorlikni qo‘llab-quvvatlash kabi tarmoqlarda umumiy qiymati 2,57 milliard dollarlik 13 ta loyiha amalga oshirilmoqda.
Aprel boshlarida Jizzaxda 6,1 mlrd dollarlik loyihalar amalga oshirilishi, Xitoy kompaniyasi Farg‘onada 144 mln dollar investitsiya hisobiga elektr energiyasini saqlash tizimini barpo etilishi to‘g‘risida xabar berilgandi.
Izoh (0)