Gruziya deputatlari xorijiy agentlar to‘g‘risidagi shov-shuvli qonun loyihasini ko‘rib chiqish chog‘ida mushtlashdi. Bu haqda “Vedomosti” xabar berdi.
Muxolifatdagi “Fuqarolar” partiyasi yetakchisi Aleko Elisashvili minbarda chiqishi chog‘ida hukmron “Gruziya orzusi” partiyasi ijrochi kotibi Mamuka Mdinaradzega musht tushirgan. Keyin boshqa deputatlar ham janjalga qo‘shilgan va parlament sayti jonli efirni to‘xtatgan.
3-aprel kuni hukmron “Gruziya orzusi” partiyasi parlamentga xorijiy agentlar haqidagi qonun loyihasini kiritdi. Mdinaradzening so‘zlariga ko‘ra, qonun loyihasi matni deyarli o‘tgan yilgidek bo‘ladi. Yagona farq “xorij ta’siridagi agent” atamasini “xorijiy davlat manfaatlarini ilgari suruvchi tashkilot”ga o‘zgartirish bo‘ladi.
Shov-shuvli qonun
5-aprel kuni Gruziya muxolifati “Rossiya ta’sirini kamaytirish”ga qaratilgan xorijiy agentlar to‘g‘risidagi muqobil qonun loyihasini ro‘yxatga oldi. Qonun loyihasida “Gruziya uchun” partiyasi deputatlarining fikricha, Gruziya konstitutsiyasida belgilangan tashqi siyosat maqsadlarini Rossiya manfaatlari yo‘lida o‘zgartirishga harakat qilayotgan yuridik va jismoniy shaxslarga nisbatan jinoiy javobgarlik belgilash taklif etiladi. Shuningdek, boshqa davlatlarning ta’sirini nazorat qilish ham o‘rin olgan.
Loyihani qabul qilishga urinish Tbilisida norozilik namoyishlari boshlangani sababli muvaffaqiyatsizlikka uchradi. Norozilik namoyishlari 2023-yil mart oyi boshida qonun loyihasi birinchi o‘qishda qabul qilinganidan keyin boshlangan. Hujjatda nodavlat notijorat tashkilotlari va ommaviy axborot vositalari daromadlarining 20 foizdan ortig‘i xorijdan keladigan bo‘lsa, ularga “xorij ta’siridagi agent” maqomini berish ko‘zda tutilgan.
2023-yil 10-mart kuni Gruziya parlamenti “Xorijiy taʼsirning shaffofligi to‘g‘risida”gi qonun loyihasini ikkinchi o‘qishda rad etdi. Shu kuni Tbilisida norozilik namoyishi yakunlangandi. Biroq u 29-apreldan qayta boshlandi. Tbilisida muxolifat va fuqarolik faollari qonun loyihasiga qarshi mitinglar o‘tkazmoqda.
Izoh (0)