Navoiy viloyati Karmana tumanida sodir bo‘lgan yo‘l-transport hodisasida ikki nafar maktab o‘quvchisi halok bo‘ldi.
“Gazeta.uz”ning viloyat Yo‘l harakati xavfsizligi boshqarmasi matbuot kotibiga tayanib yozishicha, YTHga uchragan bolalar Navoiy shahridagi 11-sonli hamda Karmana tumanidagi 5- va 7-sonli umumiy o‘rta ta’lim maktablarining o‘quvchilari bo‘lgan. 8- va 9-sinfda o‘qiydigan uch nafar bola 23-aprel kuni o‘zganing Matiz mashinasini olib, Nurota tumaniga sayohatga borgan. Mashinani haydovchilik guvohnomasi bo‘lmagan, voyaga yetmagan bolalarning o‘zi boshqargan.
Ortga qaytishda ruldagi o‘quvchi boshqaruvni yo‘qotgan va yo‘l-transport hodisasi sodir bo‘lgan. Oqibatda ikki o‘quvchi voqea joyida halok bo‘lgan. Uchinchi o‘quvchi esa og‘ir tan jarohati bilan Karmana tumani markaziy shifoxonasiga keltirilgan. Hozirda u ham jonlantirish bo‘limida og‘ir ahvolda qolmoqda.
Toshkentda 2023-yilda sodir bo‘lgan YTHlar oqibatida 95 kishi halok bo‘lgan. O‘tgan yil davomida sodir bo‘lib, jinoyat ishi qo‘zg‘atilgan 1343 ta YTHning 348 tasini 18 yoshdan 25 yoshgacha bo‘lgan haydovchilar sodir etgan. Ushbu davrda 1417 nafar fuqaro avtomashinani haydovchilik guvohnomasisiz boshqargani aniqlangan.
Izoh (0)