Навоий вилояти Кармана туманида содир бўлган йўл-транспорт ҳодисасида икки нафар мактаб ўқувчиси ҳалок бўлди.
“Газета.уз”нинг вилоят Йўл ҳаракати хавфсизлиги бошқармаси матбуот котибига таяниб ёзишича, ЙТҲга учраган болалар Навоий шаҳридаги 11-сонли ҳамда Кармана туманидаги 5- ва 7-сонли умумий ўрта таълим мактабларининг ўқувчилари бўлган. 8- ва 9-синфда ўқийдиган уч нафар бола 23 апрель куни ўзганинг Matiz машинасини олиб, Нурота туманига саёҳатга борган. Машинани ҳайдовчилик гувоҳномаси бўлмаган, вояга етмаган болаларнинг ўзи бошқарган.
Ортга қайтишда рулдаги ўқувчи бошқарувни йўқотган ва йўл-транспорт ҳодисаси содир бўлган. Оқибатда икки ўқувчи воқеа жойида ҳалок бўлган. Учинчи ўқувчи эса оғир тан жароҳати билан Кармана тумани марказий шифохонасига келтирилган. Ҳозирда у ҳам жонлантириш бўлимида оғир аҳволда қолмоқда.
Тошкентда 2023 йилда содир бўлган ЙТҲлар оқибатида 95 киши ҳалок бўлган. Ўтган йил давомида содир бўлиб, жиноят иши қўзғатилган 1343 та ЙТҲнинг 348 тасини 18 ёшдан 25 ёшгача бўлган ҳайдовчилар содир этган. Ушбу даврда 1417 нафар фуқаро автомашинани ҳайдовчилик гувоҳномасисиз бошқаргани аниқланган.
Изоҳ (0)