Ukraina Rossiyaga qarshi janglarda halok bo‘lgan 140 nafar askarning jasadini Moskvadan qaytarib oldi. Bu haqda The Kyiv Independent nashri xabar berdi.
Dastlab harbiy asirlar bo‘yicha muvofiqlashtiruvchi shtab 26-aprel kuni bu haqda xabar bergan. Shtabning Telegram tarmog‘idagi xabarida aytilishicha, halok bo‘lgan askarlarning 112 nafari Donetsk yo‘nalishida, 20 nafari Lugansk yo‘nalishida, besh nafari Sumi yo‘nalishida, ikki nafari Zaporojye yo‘nalishida va bir nafari Xerson atroflarida jang qilgan.
“Shaxslari aniqlangandan so‘ng, himoyachilarimizning jasadlari munosib dafn qilish uchun oila aʼzolariga topshiriladi”, — deyiladi Ukraina tomoni bergan rasmiy xabarda.
Halok bo‘lgan himoyachilar jasadlarini qaytarish harakatlari bir qancha hukumat va harbiy idoralar, jumladan, Ukraina Xavfsizlik xizmati, Ichki ishlar vazirligi, Favqulodda vaziyatlar davlat xizmati va qurolli kuchlar bilan hamkorlikda olib borilgan.
Xabarda aytilishicha, Xalqaro Qizil Xoch qo‘mitasi jasadlarni topshirish yuzasidan tomonlar o‘rtasida vositachilik qilgan. Ukraina rahbariyati tashkilotga minnatdorchilik bildirgan.
Joriy yilning 29-mart kuni ham 121 nafar halok bo‘lgan ukrainalik askarning jasadi dafn qilish uchun oilalariga topshirilgan edi. Ukraina prezidenti maʼmuriyati halok bo‘lganlar oilalariga hamdardligini eʼlon qilgan.
“Har bir askar biz uchun juda katta yo‘qotish. Bu urushda 31 ming Ukraina askari halok bo‘ldi. Bu biz uchun juda og‘riqli”, — degan prezident Vladimir Zelenskiy.
Izoh (0)