AQSH davlat kotibi Entoni Blinken, agar Xitoy Rossiyaga ikki maqsadli mahsulotlar yetkazib berishni to‘xtatmasa, mamlakatga nisbatan cheklov choralarini kiritishga tayyorligini ma’lum qildi.
Uning qayd etishicha, bu mavzu Pekinda Xitoy raisi Si Szinpin va tashqi ishlar vaziri Van I bilan muzokaralarda muhokama qilingan.
“Bugungi muhokamalar chog‘ida men Xitoy tomonidan Rossiyaning Ukrainaga qarshi tajovuzkorligini kuchaytiruvchi komponentlar yetkazib berilishidan jiddiy xavotirlarimizni takrorladim. Agar Xitoy bu harakatni to‘xtatish uchun hech qanday chora ko‘rmasa, biz sanksiyalar qo‘llashga to‘liq tayyormiz”, — dedi Blinken matbuot anjumanida.
U AQSH avvalroq Xitoy kompaniyalariga qarshi sanksiyalar kiritganini eslatib o‘tdi.
AQSH davlat kotibining so‘zlariga ko‘ra, Xitoy Rossiya o‘zining mudofaa-sanoat kompleksini qurishda foydalanadigan dastgohlar va mikroelektronika, shuningdek, boshqa ikki maqsadli mahsulotlarning eng yirik yetkazib beruvchisidir. Uning fikricha, Xitoy Rossiyaga yordam berishda davom etar ekan, G‘arb davlatlari bilan yaxshi munosabatlarga intila olmaydi.
Entoni Blinkenning Xitoyga tashrifi arafasida The Wall Street Journal maqola e’lon qildi, unda, xususan, Rossiya-Ukraina harbiy mojarosi boshlanganidan keyin Xitoy Rossiyaga elektron sxemalar, samolyot qismlari, mashinalar va texnikalarning asosiy yetkazib beruvchisiga aylangani aytiladi.
Xitoy banklari Rossiyaga tijorat eksportida asosiy vositachilar sifatida tilga olindi. Nashr AQSH ularga qarshi sanksiyalar joriy etishga hozirlik ko‘rayotganini ham ma’lum qilgandi.
Izoh (0)