G‘azo janubidagi Xon Yunis shahri Nosir kasalxonasidagi ommaviy qabrdan topilgan jasadlar soni 400 ga yaqinlashdi. Isroil kuchlari tibbiyot muassasasini tark etgach, bino hovlisidan jasadlar topila boshlangan. Bu haqda WAFA xabar berdi.
Isroil qo‘shinlari Xon Yunis shahridan olib chiqib ketilganidan so‘ng Nosir tibbiyot majmuasida topilgan uchta ommaviy qabrdan kamida 392 kishining jasadi topildi.
“Ba’zi jasadlarda qiynoq va qatl izlari bo‘lgan. Taxminimizcha, ularning ayrimlari tiriklayin ko‘milgan. Qidiruv tadbirlari davomida bolalarning jasadlariga duch keldik. Kasalxona hududidagi ommaviy qabrlardan bolalar jasadlari topilgani sababini hozircha bilmaymiz. Bosqinchi Isroil askarlari jasadlarni polietilen paketlarga solib kasalxona hududiga 3 metr chuqurlikka ko‘mgan. Bu esa jasadlar maydalanib ketishiga olib kelgan, shu sababdan 165 jasadning shaxsini aniqlash imkoni bo‘lmagan”, — deydi Xon Yunisning fuqarolik mudofaasi bo‘limi direktori Yamin Abu Sulaymon.
Jasadlarning Falastin xalqi tomonidan ko‘milmaganiga diqqat qaratgan fuqarolik mudofaasi guruhidan Muhammad Mugayr jasadlarning 3 metr chuqurlikda ko‘milishi g‘azoliklar tomonidan qabul qilingan dafn qilish usullariga zid ekanini aytdi.
Isroil armiyasi 15-fevral kuni Xon Yunisda reyd o‘tkazdi. 24-mart kuni Isroil askarlari yana kasalxonani qurshab oldi va ko‘plab falastinliklar hamda tibbiyot xodimlarini hibsga oldi. Isroil armiyasi 4 oylik qamaldan so‘ng 7-aprel kuni Xon Yunisdan chekindi. Qo‘shinlar olib chiqilgach, shaharda ommaviy qabrlar topila boshlandi, halok bo‘lganlarning jasadlari uylar vayronalari va yo‘l chetlaridan topildi.
Izoh (0)