Isroil harbiylari qamal qilgan Al-Shifo kasalxonasidan 300 dan ortiq jasad topildi — CNN

Isroil mudofaa kuchlari tomonidan 14 kun davomida qamal qilingan Al-Shifo kasalxonasidan 300 dan ortiq falastinlik jasadlari topildi. Bu haqda CNN nashri xabar berdi.

Bir qancha internet nashrlari Isroil armiyasi tark etgan Al-Shifo kasalxonasining shturmdan keyingi sunʼiy yo‘ldosh tasvirlarini eʼlon qilgan. Ularda bino hududining to‘la vayron bo‘lganini kuzatish mumkin.

Maxar Technologies manbasiga ko‘ra,14 kunlik qamal paytida bino vayron qilingan va uning ayrim qismlari buldozerlar bilan tekislab tashlangan. 1-aprel kuni olingan suratlar bu maʼlumotni tasdiqlaydi.

G‘azo fuqarolik mudofaasi tashkiloti maʼlumotlariga ko‘ra, hozirgacha majmuada kamida 300 jasad topilgan. Tekshiruv davomida bu raqam yana ko‘payishi mumkinligi aytilgan.

G‘azo rasmiylaridan kapitan Mahmud Bassal CNN telekanaliga bergan intervyusida jarohatlanganlar va o‘liklar kasalxona hududini to‘ldirib borayotganini aytgan.

Isroil bosh vaziri Binyamin Netanyaxu 31-mart kuni shifoxona hududida 200 dan ortiq HAMAS askari o‘ldirilganini maʼlum qilgan edi. Isroil mudofaa kuchlari bir necha bor Al-Shifo majmuasi qurolli jangarilar tomonidan foydalanilganini daʼvo qilgan edi.