O‘zbekiston Olimpiya terma jamoasi bugun Osiyo Kubogi chorak final doirasidan o‘rin olgan uchrashuvda Saudiya Arabistoniga qarshi maydonga tushadi. Uchrashuv oldidan ikki jamoa haqida batafsil to‘xtalamiz.
Chorak finalgacha yo‘l
Saudiya Arabistoni jamoasi saralash o‘yinlarida Kambodja, Livan hamda Mo‘g‘uliston jamoalariga qarshi maydonga tushdi. Jamoa Livan ustidan 3:0, Kambodja bilan 6:1 hamda Mo‘g‘uliston bilan 3:1 hisobida o‘ynab, barcha uchrashuvlarni qo‘shib hisoblaganda 12 bora raqiblar darvozasini ishg‘ol qilgan va o‘z darvozasidan 2 to‘p olib chiqqan. Jamoa 9 ochko bilan musobaqaning final bosqichiga yo‘l olgan.
Qatarda bo‘lib o‘tayotgan musobaqada Saudiya jamoasi C guruhida ikkinchi o‘rin bilan chorak finalga yo‘l oldi.
Jamoa birinchi turda Tojikiston bilan 4:2 hisobida o‘ynadi, ikkinchi turda Tailand ustidan yirik 5:0 hisobida g‘alaba qozondi. Uchinchi turda Iroqqa 1:2 hisobida yutqazgan saudiyaliklar 6 ochko bilan ikkinchi o‘rinda guruh o‘yinlarini yakunladi.
To‘purarlar
Guruh o‘yinlarida saudiyaliklar 10 bora raqiblarini ranjitishdi va gollarning uchtasiga Ayman Yahyo hamda Abdulloh Hadi Radif mualliflik qildi.
Natijalari
Jamoa musobaqalarning barchasida qatnashgan. Jamoa 2022-yilda Toshkentda o‘tkazilgan musobaqada chempionlikka erishgan. Saudiya Arabistoni jamoasi finalda O‘zbekiston Olimpiya termasi ustidan 2:0 hisobida g‘alaba qozongan.
Saudiya Arabistoni — musobaqalarning 3 tasida finalgacha yo‘l olgan yagona jamoa.
Eng qimmat o‘yinchi
Saudiya safidagi Musab Al-Juvayr hozirda “Al-Shabab” jamoasi o‘yinchisi hisoblanadi. Transfermarkt uning taxminiy transfer narxini 375 ming yevro sifatida qayd etgan.
O‘zbekiston Olimpiya jamoasi ham musobaqadagi eng sermahsul jamoalardan biri hisoblanadi.
Chorak finalgacha yo‘l
O‘zbekiston Olimpiya jamoasi Osiyo Kubogi saralashi doirasidagi barcha uchrashuvda g‘alaba qozondi. Birinchi turda Afg‘oniston 8:1 hisobida taslim etildi. Ikkinchi turda O‘zbekiston Olimpiyachilari o‘z tarixidagi eng yirik g‘alabaga erishdi — 10:0. Eron bilan so‘nggi uchrashuv kurashlarga boy bo‘ldi. Abbosbek Fayzullayevning 47-daqiqada urgan goli terma jamoaning 9 ochko bilan guruh o‘yinlarini birinchi o‘rin bilan yakunlashiga zamin yaratdi.
Qatardagi musobaqada D guruhidan o‘rin olgan O‘zbekiston olimpiyachilari birinchi tur o‘yinini Malayziyaga qarshi o‘tkazdi. Uchrashuvda Jaloliddinov va Hoshimovlar o‘z hisobiga gol yozdirib qo‘ydi.
Ikkinchi turda O‘zbekiston Kuvayt ustidan yirik 5:0 hisobida g‘alaba qozondi. Yakuniy turda Vyetnam taslim etildi. Bu safar Odilovning dubli va Jiyanovning goli evaziga O‘zbekiston 3:0 hisobida g‘alaba qozonib, guruhni birinchi o‘rinda yakunladi.
E’tiborlisi, O‘zbekiston Olimpiya jamoasi hozirgacha o‘z darvozasidan to‘p olib chiqmadi.
To‘purarlar
O‘zbekiston Olimpiadachilari guruh o‘yinlarida 10 bora raqiblar darvozasiga yo‘l topishdi. Qiziqarli Tomoni, O‘zbekiston futbolchilaridan faqat Odilov o‘z hisobiga ikkita gol yozdirishga erishdi. Qolgan 8 golga 8 ta futbolchi mualliflik qildi.
Natijalari
O‘zbekiston Olimpiya termasining eng yaxshi natijasi ham chempionlik hisoblanadi. Jamoa 2018-yilda Xitoyda o‘tkazilgan musobaqada Ravshan Haydarov boshchiligida g‘oliblikni nishonlagan.
Olimpiya jamoasi 2022-yilda Toshkentda o‘tkazilgan musobaqalarning finalida mag‘lubiyatga uchragan.
Eng qimmat o‘yinchi:
O‘zbekiston Olimpiya terma jamoasining eng qimmat o‘yinchisi sifatida Abbosbek Fayzullayev ko‘rsatilgan. Transfermarkt uning taxminiy transfer narxini 5 million yevroga baholagan. Abbosbek hozirda Rossiyaning “SSKA” klubida o‘ynab kelmoqda.
So‘nggi 5 o‘yin natijalari
O‘zbekiston — Saudiya Arabistoni 2:1 (Osiyo O‘yinlari 2023-yil, 1-oktyabr);
O‘zbekiston — Saudiya Arabistoni 0:2 (Osiyo Kubogi 2022-yil, 19-iyun);
Saudiya Arabistoni — O‘zbekiston 2:0 (O‘rtoqlik o‘yini 2022-yil, 23-mart);
Saudiya Arabistoni — O‘zbekiston 1:0 (Osiyo Kubogi 2020-yil, 22-yanvar);
O‘zbekiston — Saudiya Arabistoni 2:3 (Osiyo O‘yinlari 2014-yil, 26-sentyabr).
Uchrashuv haqida
Saudiya Arabistoni va O‘zbekiston Olimpiya jamoalari o‘rtasidagi uchrashuv bugun 26-aprel kuni bo‘lib o‘tadi. Khalifa International Stadium’da bo‘lib o‘tadigan o‘yin 19:00 da boshlanadi. G‘olib jamoa yarim finalda Indoneziyaga qarshi bahs olib boradi.
Izoh (0)