Ўзбекистон Олимпия терма жамоаси бугун Осиё Кубоги чорак финал доирасидан ўрин олган учрашувда Саудия Арабистонига қарши майдонга тушади. Учрашув олдидан икки жамоа ҳақида батафсил тўхталамиз.
Чорак финалгача йўл
Саудия Арабистони жамоаси саралаш ўйинларида Камбоджа, Ливан ҳамда Мўғулистон жамоаларига қарши майдонга тушди. Жамоа Ливан устидан 3:0, Камбоджа билан 6:1 ҳамда Мўғулистон билан 3:1 ҳисобида ўйнаб, барча учрашувларни қўшиб ҳисоблаганда 12 бора рақиблар дарвозасини ишғол қилган ва ўз дарвозасидан 2 тўп олиб чиққан. Жамоа 9 очко билан мусобақанинг финал босқичига йўл олган.
Қатарда бўлиб ўтаётган мусобақада Саудия жамоаси C гуруҳида иккинчи ўрин билан чорак финалга йўл олди.
Жамоа биринчи турда Тожикистон билан 4:2 ҳисобида ўйнади, иккинчи турда Таиланд устидан йирик 5:0 ҳисобида ғалаба қозонди. Учинчи турда Ироққа 1:2 ҳисобида ютқазган саудияликлар 6 очко билан иккинчи ўринда гуруҳ ўйинларини якунлади.
Тўпурарлар
Гуруҳ ўйинларида саудияликлар 10 бора рақибларини ранжитишди ва голларнинг учтасига Айман Яҳё ҳамда Абдуллоҳ Ҳади Радиф муаллифлик қилди.
Натижалари
Жамоа мусобақаларнинг барчасида қатнашган. Жамоа 2022 йилда Тошкентда ўтказилган мусобақада чемпионликка эришган. Саудия Арабистони жамоаси финалда Ўзбекистон Олимпия термаси устидан 2:0 ҳисобида ғалаба қозонган.
Саудия Арабистони — мусобақаларнинг 3 тасида финалгача йўл олган ягона жамоа.
Энг қиммат ўйинчи
Саудия сафидаги Мусаб Ал-Жувайр ҳозирда “Ал-Шабаб” жамоаси ўйинчиси ҳисобланади. Transfermarkt унинг тахминий трансфер нархини 375 минг евро сифатида қайд этган.
Ўзбекистон Олимпия жамоаси ҳам мусобақадаги энг сермаҳсул жамоалардан бири ҳисобланади.
Чорак финалгача йўл
Ўзбекистон Олимпия жамоаси Осиё Кубоги саралаши доирасидаги барча учрашувда ғалаба қозонди. Биринчи турда Афғонистон 8:1 ҳисобида таслим этилди. Иккинчи турда Ўзбекистон Олимпиячилари ўз тарихидаги энг йирик ғалабага эришди — 10:0. Эрон билан сўнгги учрашув курашларга бой бўлди. Аббосбек Файзуллаевнинг 47-дақиқада урган голи терма жамоанинг 9 очко билан гуруҳ ўйинларини биринчи ўрин билан якунлашига замин яратди.
Қатардаги мусобақада D гуруҳидан ўрин олган Ўзбекистон олимпиячилари биринчи тур ўйинини Малайзияга қарши ўтказди. Учрашувда Жалолиддинов ва Ҳошимовлар ўз ҳисобига гол ёздириб қўйди.
Иккинчи турда Ўзбекистон Кувайт устидан йирик 5:0 ҳисобида ғалаба қозонди. Якуний турда Вьетнам таслим этилди. Бу сафар Одиловнинг дубли ва Жияновнинг голи эвазига Ўзбекистон 3:0 ҳисобида ғалаба қозониб, гуруҳни биринчи ўринда якунлади.
Эътиборлиси, Ўзбекистон Олимпия жамоаси ҳозиргача ўз дарвозасидан тўп олиб чиқмади.
Тўпурарлар
Ўзбекистон Олимпиадачилари гуруҳ ўйинларида 10 бора рақиблар дарвозасига йўл топишди. Қизиқарли Томони, Ўзбекистон футболчиларидан фақат Одилов ўз ҳисобига иккита гол ёздиришга эришди. Қолган 8 голга 8 та футболчи муаллифлик қилди.
Натижалари
Ўзбекистон Олимпия термасининг энг яхши натижаси ҳам чемпионлик ҳисобланади. Жамоа 2018 йилда Хитойда ўтказилган мусобақада Равшан Ҳайдаров бошчилигида ғолибликни нишонлаган.
Олимпия жамоаси 2022 йилда Тошкентда ўтказилган мусобақаларнинг финалида мағлубиятга учраган.
Энг қиммат ўйинчи:
Ўзбекистон Олимпия терма жамоасининг энг қиммат ўйинчиси сифатида Аббосбек Файзуллаев кўрсатилган. Transfermarkt унинг тахминий трансфер нархини 5 миллион еврога баҳолаган. Аббосбек ҳозирда Россиянинг “ЦСКА” клубида ўйнаб келмоқда.
Сўнгги 5 ўйин натижалари
Ўзбекистон — Саудия Арабистони 2:1 (Осиё Ўйинлари 2023 йил, 1 октябрь);
Ўзбекистон — Саудия Арабистони 0:2 (Осиё Кубоги 2022 йил, 19 июнь);
Саудия Арабистони — Ўзбекистон 2:0 (Ўртоқлик ўйини 2022 йил, 23 март);
Саудия Арабистони — Ўзбекистон 1:0 (Осиё Кубоги 2020 йил, 22 январь);
Ўзбекистон — Саудия Арабистони 2:3 (Осиё Ўйинлари 2014 йил, 26 сентябрь).
Учрашув ҳақида
Саудия Арабистони ва Ўзбекистон Олимпия жамоалари ўртасидаги учрашув бугун 26 апрель куни бўлиб ўтади. Khalifa International Stadium’да бўлиб ўтадиган ўйин 19:00 да бошланади. Ғолиб жамоа ярим финалда Индонезияга қарши баҳс олиб боради.
Изоҳ (0)