BMT Xavfsizlik kengashining 15 a’zosidan 13 nafari koinotda qurollanish poygasining oldini olishga chaqiruvchi rezolyutsiya uchun ovoz berdi. Xitoy betaraf qoldi, Rossiya esa unga veto qo‘ydi. Bu haqda Deutsche Welle xabar berdi.
Rezolyutsiyaga ovoz berish jarayoni 24-aprel kuni bo‘lib o‘tgan. Ovoz berish boshlanishidan avval Rossiyaning BMTdagi doimiy vakili Vasiliy Nebenzya AQSH va Yaponiya taklif qilgan rezolyutsiya matnini “hazil” deb atagan. AQSH doimiy vakili o‘rinbosari Robert Vud, agar Rossiya qarshi ovoz bersa, demak, “yashirish uchun nimadir bormi?” degan savol tug‘ilishini aytgan.
Rezolyutsiya loyihasida “bizning umumiy maqsadimiz — koinotda qurollanish poygasining oldini olish” deya qayd etilgan.
Shuningdek, Kosmos shartnomasi bo‘yicha majburiyatlarga rioya qilish, xususan, “Yer atrofidagi orbitaga har qanday yadro quroli yoki ommaviy qirg‘in qurollarini joylashtirmaslik kerakligi” ta’kidlangan. Bundan tashqari hujjat BMT Xavfsizlik kengashi aʼzolarini “Yer atrofidagi orbitaga joylashtirish uchun maxsus yadro qurolini ishlab chiqarmaslikka” chaqiradi.
Rossiya koinotda har qanday qurollarni taqiqlashga intilmoqda
Nebenzya hujjatni qo‘llab-quvvatlashdan bosh tortishini taqiq nafaqat yadro quroliga, balki oddiy qurollarga ham tegishli bo‘lishi kerakligi bilan izohladi.
AQSH Moskvani sun‘iy yo’ldoshlarga qarshi yadroviy qurol ishlab chiqarayotganlikda aybladi. Rossiya buni rad etadi. 1967-yilgi Kosmos shartnomasi koinotda yadroviy qurollarni joylashtirishni taqiqlaydi. AQSH va Rossiya mazkur shartnomani imzolaganlar qatoriga kiradi.
Izoh (0)