Qozog‘iston prezidenti Qosim-Jo‘mart To‘qayev suv toshqinidan jabr ko‘rgan fuqarolarga yo‘naltirish uchun davlat mablag‘larini tejashning qat’iy rejimini joriy etish to‘g‘risida qaror qabul qildi.
“Prezident davlat mablag‘larini fuqarolarga yo‘naltirish uchun tejamkorlik rejimini joriy etish to‘g‘risida qaror qabul qildi, shuningdek, barcha jabrlanganlarga zarur yordam ko‘rsatilishini bildirdi”, — deyiladi davlat rahbari matbuot xizmati xabarida.
Shuningdek, jabrlanganlarga tovon puli to‘lanishi ham e’lon qilingan. Bundan tashqari, uy-joyidan ayrilgan yoki ta’mirlashga muhtoj bo‘lganlarga mablag‘ ajratiladi.
“Kim kvartiraga ko‘chib o‘tishni istasa, kvartiralar sotib olamiz. Kim o‘z joyida qolishni istasa, ular uchun namunaviy uylar quramiz. Lekin hech kim yashash uchun xavfli joylarda qolmasligi kerak. Bunday uylar butun yoz davomida va qishgacha quriladi, men hukumat oldiga kelgusi yozgacha ofat oqibatlarini to‘liq bartaraf etish vazifasini qo‘ydim”, — deya Qo‘stanay viloyati aholisi bilan uchrashuvdagi To‘qayevning so‘zlaridan iqtibos keltirdi matbuot xizmati.
Avvalroq Qosim-Jo‘mart To‘qayev Qozog‘istondagi hozirgi suv toshqinlarini so‘nggi 80 yildagi eng yirik suv toshqinlari deb atagan va qator viloyatlarda favqulodda holat e’lon qilgan edi. Qozog‘iston Favqulodda vaziyatlar vazirligining so‘nggi ma’lumotlariga ko‘ra, mart oyi boshidan buyon xavfli suv toshqini hududlaridan evakuatsiya qilinganlar soni 113 ming kishidan oshgan, ulardan deyarli 40 ming nafari bolalardir.
Izoh (0)