Қозоғистон президенти Қосим-Жўмарт Тўқаев вейпларни мамлакатга олиб кириш, ишлаб чиқариш ва сотишни тақиқлашни назарда тутувчи қонунни имзолади. Бу ҳақда Akorda хабар берди.
Мамлакатда бундай ҳаракатлар учун жиноий жавобгарлик белгиланади. Вейпларни сотиш 200 ойлик ҳисоб кўрсаткичи (1,6 минг доллар) миқдорида жаримага тортишни ёки 50 суткагача ҳибсга олишни назарда тутади.
Электрон истеъмол тизимларини (вейп) олиб кириш ва ишлаб чиқариш 2000 ойлик ҳисоб кўрсаткичи (16,5 минг доллар)гача жарима, икки йилгача озодликни чеклаш ёки худди шу муддатга озодликдан маҳрум қилиш билан жазоланади.
Қонун, шунингдек, чекилмайдиган тамаки маҳсулотлари, вейплар, ароматизаторлар ва улар учун суюқликларни реклама қилишни тақиқлайди. Қонун матбуотда расмий эълон қилинган кундан бошлаб 60 кун ўтгач кучга киради.
Қозоғистонда нос ва чилимга ҳам тақиқ қўйилмоқда
Қозоғистон президенти Қосим-Жўмарт Тўқаев 15 март куни Миллий қурултой йиғилишида аҳолининг соғлиғига зарар етказувчи гиёҳвандлик ва бошқа моддалар, жумладан, носвойнинг зарари ҳақида гапирди.
Шундан кейин 18—31 март кунлари аҳоли ўртасида носвойнинг зарари, уни сотиш бўйича тақиқланган талабларга тадбиркорлар томонидан риоя қилиш зарурлиги ҳақида ҳуқуқий тушунтириш ишлари олиб борилди. «Халқ саломатлиги ва соғлиқни сақлаш тизими тўғрисида»ги кодексда чекилмайдиган тамаки маҳсулотларини, жумладан, носвойни олиб кириш, ишлаб чиқариш, сотиш ва тарқатишни тақиқлаш назарда тутилган.
Унга кўра, чекмайдиган тамаки маҳсулотларини ноқонуний сотиш 25 ойлик ҳисоб-китоб кўрсаткичи миқдорида ёки 92 минг тенгедан ортиқ (тахминан 2 миллион 571 минг) миқдорда жарима тортишга сабаб бўлади. Савдо қоидаларини бузиш фактлари аниқланса, айбдорлар қонун ҳужжатларида белгиланган тартибда жавобгарликка тортилади.
Ҳозирда Қозоғистон Соғлиқни сақлаш вазирлиги мамлакатда чилимга тўлиқ тақиқ жорий этиш масаласини муҳокама қилмоқда. Амалдаги қонунчиликда жамоат жойларида чилим учун табака, чилим аралашмасини истеъмол қилиш тақиқланади. Белгиланмаган жойларда чилим чекканлик учун жисмоний шахсларга 2024 йилда 55 380 дан 184 600 тенгегача (1 млн 580 мингдан 26 млн 212 минг сўмгача) жарима белгиланган. Бироқ ССВ жарима миқдори етарли даражада бўлмагани учун қонунга амал қилинмаётганини таъкидлаган.
Изоҳ (0)