AQSH Senatining razvedka qo‘mitasi rahbari Mark Uorner hafta oxirigacha Ukraina Qo‘shma Shtatlardan qurol-yarog‘larning yangi partiyasini olishi mumkinligini aytdi. Bu haqda tegishli manbalarga tayanib, Deutsche Welle xabar berdi.
Yordam paketida 300 kilometrgacha uzoqlikdagi nishonlarni urib tushirishga mo‘ljallangan ATACMS raketalari ham bor.
Qurol-yarog‘lar AQSH prezidenti Jo Bayden qonun loyihasini imzolashi bilanoq jo‘natiladi, — deya qo‘shimcha qilgan Uorner.
ATACMS raketalari Ukrainaga Rossiya tomonidan bosib olingan mamlakatning barcha hududlaridagi nishonlarni urish imkonini berishi aytilmoqda. Tahlilchilarning fikriga ko‘ra, ATACMS aerodromlardagi samolyotlar, havo mudofaa tizimlari, neftni qayta ishlash zavodlari va yuk mashinalari bilan logistika markazlari kabi nishonlarga qarshi samarali.
20-aprel kuni respublikachilar va AQSH Kongressining Vakillar palatasi bir necha oylik qarama-qarshiliklardan so‘ng Ukrainaga qariyb 61 milliard dollar miqdoridagi keng ko‘lamli yordam paketini ma’qulladi. Qonun loyihasini 311 kongressmen ma’qullagan, 112 kishi qarshi ovoz bergan.
Quyi palata ma’qullaganidan keyin qonun loyihasi Senat tomonidan qabul qilinishi kerak. Ovoz berish 23-aprelga belgilangan. AQSH prezidenti Jo Bayden bu hujjatni darhol imzolashini aytgan.
AQSH qonun chiqaruvchi organida demokratlar va respublikachilar o‘rtasidagi Ukrainaga keyingi yordam masalasidagi ziddiyat 2023-yil oxiridan beri davom etmoqda.
Izoh (0)