Armaniston va Ozarbayjon birinchi marta o‘rtadagi chegaraning bir qismi qanday o‘tishini kelishib oldi. Bu haqda Armaniston TIV xabar berdi.
Tomonlar to‘rtta aholi punkti o‘rtasida chegara chizig‘ining alohida uchastkalarini o‘tkazish to‘g‘risida oldindan kelishib oldi va bu uchastkalarni Sovet Ittifoqi parchalangan paytdagi chegaraga moslashtirishga erishdi, — deyiladi xabarda.
Ozarbayjon buni tasdiqlagan.
Ushbu kelishuv natijasida Yerevan 1990-yillarning boshidan beri Armaniston nazoratidagi Tavush viloyatida joylashgan to‘rtta qishloqni Ozarbayjon nazoratiga o‘tkazadi. Shuningdek, chegarani delimitatsiya qilish va xavfsizlik bilan bog‘liq xavf-xatarlarning kamayishiga erishiladi.
Boku va Yerevan yaqin kelajakda qo‘shinlarni kelishilgan uchastkalardan va u yerdagi stansiya chegara xizmatlaridan olib chiqishga kelishib oldi.
Avvalroq Rossiya o‘z tinchlikparvar kuchlarini Tog‘li Qorabog‘dan olib chiqishni boshlagani xabar qilingan edi. Rossiya qo‘shinlari 2020-yil kuzida Armaniston-Ozarbayjon mojarosining yana kuchayishi natijasida Ozarbayjon, Armaniston va Rossiya tomonidan tuzilgan kelishuvlarga muvofiq Tog‘li Qorabog‘ga joylashtirilgandi.
2023-yil sentyabr oyida Boku ikki kunlik harbiy amaliyotlar natijasida tan olinmagan Tog‘li Qorabog‘ Respublikasi hududini to‘liq nazorat ostiga olganidan so‘ng, 120 ming nafar arman bahsli hududni tark etgan.
Armaniston va Ozarbayjon mojaroni hal qilish uchun muzokaralar olib bormoqda. Bundan tashqari, 2024-yilda tomonlar bir-birini chegarada o‘q uzganlikda bir necha bor o‘zaro ayblagan.
Izoh (0)