Rossiya tinchlikparvar kuchlari 17-aprel kuni Ozarbayjon tarkibidagi Tog‘li Qorabog‘ hududini tark etishni boshladi. Bu haqda Kreml tarqatgan xabarlarga tayanib, The Moscow Times nashri xabar berdi.
Manbada aytilishicha, Moskva ko‘rsatmasi bilan Tog‘li Qorabog‘dan rus harbiy qismlarini bosqichma-bosqich olib chiqish boshlangan. Kreml rasmiylari ham qo‘shinlari olib chiqilishini tasdiqlagan.
Voqea haqida dastlab xalqaro nashrlardan Ozarbayjonning Musavat axborot nashri maʼlum qilgan. So‘ngra ko‘plab xalqaro nashrlar rus hukumati bilan bog‘lanib, vaziyatga aniqlik kiritgan.
Ozarbayjon media segmentida tarqatilgan tasdiqlanmagan kadrlarda Shimoliy Kavkaz hududidan Rossiya bayrog‘i ostidagi harbiy mashinalar karvoni harakatlanayotgani ko‘rsatilgan. Nashrlar qo‘shinlar ko‘chirilishini ularga zarurat qolmaganligi bilan izohlagan.
Rossiya tinchlikparvar kuchlari Qorabog‘ hududiga 2020-yil noyabr oyida Armaniston va Ozarbayjon o‘rtasida yuzaga kelgan keskinlikdan so‘ng joylashtirilgan edi. O‘sha paytda rus kontingenti hajmi 2000 nafarga yaqin harbiy xizmatchi va 90 ta zirhli transport vositasidan iborat bo‘lgani maʼlum qilingan.
2023-yil sentyabrida Ozarbayjon Tog‘li Qorabog‘ni to‘la egallash uchun maxsus operatsiya o‘tkazdi. Oqibatda poytaxti Stepanakert bo‘lgan tan olinmagan respublika Boku qo‘liga o‘tdi. Unda yashayotgan 100 mingga yaqin etnik armanlar Armanistonga ko‘chib o‘tdi.
Qariyb 30 yil davomida Yerevanga bo‘ysungan hududlar Ozarbayjonga o‘tish va Rossiya bunga taʼsir eta olmasligi mintaqadagi rus tinchlikparvar kuchlari mavqeyiga putur yetkazgan edi.
Izoh (0)