“Tolibon” rahbariyatiga yaqin bo‘lgan Maulvi Umar Jan Oxundzoda 19-aprel kuni Pokistondagi qurolli hujumda o‘ldirildi. Bu haqda Sputnik Afghanistan manbasi xabar berdi.
Manbaga ko‘ra, o‘ldirilgan Maulvi Umar Jan Oxundzoda Afg‘onistonning Qandahor viloyatidagi jihodchilar maktabi rahbari bo‘lgan. Shuningdek, u “Tolibon” yetakchisi mulla Haybatulloh Oxundzodaga yaqin kishilardan bo‘lgan.
Maulvi Umar Jan Oxundzoda Pokistonning Kvetta shahrida qurolli shaxslar tomonidan o‘ldirilgan. Uning jasadi 19-aprel, juma kuni Afg‘onistonning Zobul viloyatida dafn etilgan.
Umar Oxundzoda Pokistonga hayit bayramini o‘tkazish uchun borgani, uning oilasi ham Pokistonda istiqomat qilishi aytilgan.
Bir qancha xalqaro nashrlar o‘ldirilgan Umar Oxundzodani qora ro‘yxatdagi xavfli shaxs sifatida keltirgan. Unga terrorchilarni mafkuraviy jihatdan tayyorlab borish aybi qo‘yilgan.
“Tolibon”ga yaqin vakilning Pokistonda kim tomonidan o‘ldirilgani hozircha nomaʼlum. Islomoboddagi hukumat bu suiqasdga aloqadorlikni rad etib, qotillikda terrorchilik guruhlarni ayblagan.
Izoh (0)