Livandagi “Hizbulloh” guruhi Isroil shimolidagi harbiy markazga hujum uyushtirgan. Bu haqda The Defence Post manbasi xabar berdi.
Manbaga ko‘ra, hujum oqibatida Isroilning 14 nafar askari yaralangan. Chegaraoldi harbiy inshootlariga jiddiy shikast yetkazilgan.
Bir qancha arab nashrlari harbiy markazga yaqin aholi punktlaridan fuqarolar evakuatsiya qilinganini yozgan. Isroil rasmiy manbalari esa xabarlarga oydinlik kiritmagan.
So‘nggi bir necha kun ichida “Hizbulloh”ning Isroil shimoliga hujumlari faollashgani xabar qilingan. Guruh harbiy dronlar va raketalar vositasida Tel-Aviv rejimining tobora ichkari hududlariga zarba bermoqda.
“Hizbulloh” rasmiylari maʼlum qilishicha, guruh tomonidan uyushtirilgan hujum Isroil shimolidagi Arab al-Aramshe harbiy markazini vayron qilgan. Bunga javoban Isroil Livan sharqidagi nishonlarga zarba bergan.
Shuningdek, Isroil qiruvchi samolyotlari “Hizbulloh”ning Baalbek hududidagi havo mudofaasi inshootlariga ham zarba bergan. Dronlar hujumi ham qayd etilgan.
“Hizbulloh” hujumida yaralangan 14 askarning 6 nafari og‘ir ahvolda ekani maʼlum qilingan. Jarohatlanganlar zudlik bilan harbiy kasalxonaga joylashtirilgan.
Maʼlumotlarga ko‘ra, Isroil va Livan keskinligi boshlangandan beri Livanda kamida 368 kishi halok bo‘lgan. Ulardan 70 nafari tinch aholi vakillari bo‘lgan.
Isroilda harbiy harakatlar boshlanganidan beri shimoliy chegara yaqinida 10 nafar askar halok bo‘lgan. Jami sakkiz nafar tinch aholi vakillari qurbon bo‘lgani aytilgan.
Izoh (0)