G‘azo sektoridagi Al-Shifo kasalxonasida topilgan 2 ta ommaviy qabrdan 30 dan ortiq jasadlar chiqarib olindi. Bu haqda Anadolu nashri xabar berdi.
Manbada aytilishicha, ommaviy qabrlar 19-aprel kuni topilgan. Jasadlar orasida ayollar va keksalar borligi maʼlum qilingan.
Isroil armiyasi G‘azo sektoridagi eng yirik kasalxonaga 14 kunlik harbiy reyd uyushtirgach, hududni tark etgan. Hudud inshootlari to‘la vayron qilingan.
“Jasadlar ko‘milgan ommaviy qabrlar shifoxonaning jonlantirish bo‘limi tashqarisidagi hovlidan topilgan”, — deyiladi rasmiy xabarda.
Hozirda qurbonlardan 12 nafarining shaxsi aniqlangan. Qolganlarining maʼlumotlari aniqlashtirilmoqda.
Manbaga ko‘ra, qabrlar ochib ko‘rilganda, ularning qo‘llari bog‘lanib, kiyimlari yechib olingani maʼlum bo‘lgan. Bu jasadlar tiriklayin ko‘milgan bo‘lishi mumkinligini anglatishi mumkin.
Isroil armiyasi shifoxonaga reyd uyushtirganidan beri 1000 nafarga yaqin odam, jumladan, tibbiyot xodimlari va jurnalistlarning taqdiri noaniq qolmoqda. Hududda bedarak yo‘qolganlar qidirilmoqda.
Maʼlumotlarga ko‘ra, hozirga qadar G‘azoda 34 000 dan oshiq falastinlik, asosan, ayollar va bolalar halok bo‘lgan. 76 800 nafarga yaqin aholi vakillari yaralangan.
Birlashgan Millatlar Tashkiloti maʼlumotlariga ko‘ra, Isroil urushi G‘azo aholisining 85 foizini oziq-ovqat, toza suv va dori-darmonlarning keskin tanqisligi sharoitida ichki ko‘chishga majbur qilgan. Anklav infratuzilmasining 60 foizi shikastlangan yoki vayron bo‘lgan.
Izoh (0)