Toshkent shahrida yana bir profilaktika inspektoriga sovuq qurol bilan hujum qilindi. Bu haqda “Daryo” manbasi xabar qildi.
Manbaga ko‘ra, voqea poytaxtning Yangihayot tumanida sodir bo‘lgan.
Pichoqlash voqeasi 14-aprel kuni soat 16:30 dan keyin bo‘ldi. O‘sha kuni IIB xodimi chaqiruv bo‘yicha voqea joyiga borib, xizmat vazifasini bajarayotgan bo‘lgan, — deydi axborot beruvchi manba.
Bildirilishicha, IIB xodimiga pichoq ko‘targan fuqaro muqaddam sudlangan shaxs bo‘lgan.
Ayni paytda “uchastkavoy” 16-shifoxona (Respublika shoshilinch tez tibbiy yordam ilmiy markazi)da davolanmoqda. Ahvoli og‘irroq, — deydi u.
Shu yilning 8-aprel kuni Toshkent viloyatining Toshkent tumanida mahalla profilaktika inspektori pichoqlangani, holat bo‘yicha Jinoyat kodeksining 219-moddasi 2-qismi (xizmat vazifasini bajarayotgan hokimiyat vakiliga burchini bajarishdan voz kechishga, shuningdek, qonunga xilof harakatlar sodir etishga majbur qilish) bilan jinoyat ishi qo‘zg‘atilgani xabar berilgandi.
Izoh (0)