Isroil bosh vaziri Binyamin Netanyaxu Isroil armiyasidan Eronning yirik havo hujumiga javob qaytarishi mumkin bo‘lgan nishonlar ro‘yxatini tayyorlashni so‘radi. Bu haqda ismi oshkor etilmagan amaldorga tayanib, The Washington Post xabar berdi.
Ma’lum bo‘lishicha, Isroil “signal yuborishi” mumkin bo‘lgan, ammo qurbonlar keltirmaydigan variantlarni ko‘rib chiqmoqda. Bu variantlar orasida Tehrondagi obyektga ehtimoliy zarba yoki kiberhujum ham mavjud.
Hamma Isroil javob berishi kerak degan fikrga qo‘shiladi. Gap qanday javob berish, qachon javob berishda, — deydi WP suhbatdoshi.
NBC News telekanaliga ko‘ra, Isroil rasmiylarining bir necha soat davom etgan yig‘ilishida “bir qator harbiy va diplomatik variantlar” muhokama qilingan.
15-aprel kungi brifingda AQSH Milliy xavfsizlik kengashi spikeri Jon Kirbi prezident ma’muriyati iqtisodiy bosimni kuchaytirish orqali Eronni yanada xalqaro yakkalanishiga erishish ustida ishlayotganini aytgan.
Bu natija. Kuchli Isroil, zaif Eron, hamkorlarning yanada jipslashgan ittifoqi, — deya xulosa qilgan Kirbi.
Eron 14-aprelga o‘tar kechasi Isroilga 300 dan ortiq dron va raketalarni uchirgach, AQSH, Birlashgan Millatlar Tashkiloti hamda Isroilning Yevropa va Yaqin Sharq mintaqalaridagi ittifoqchilari har ikki davlatni vazminlikka chaqirgan.
Izoh (0)