Buxoro viloyati Buxoro shahrida yashovchi 33 yoshli (ayol) Sh.G. ichki ishlar organlariga murojaat qilib, bank kartasidan 9 mln so‘m miqdoridagi pul mablag‘lari nomaʼlum shaxs tomonidan firibgarlik yo‘li bilan o‘zlashtirilganini maʼlum qilgan. Bu haqda Kiberxavfsizlik markazi xabar berdi.
O‘tkazilgan tezkor-qidiruv tadbirlari natijasida mazkur jinoyatni Andijon viloyati Andijon shahrida yashovchi 33 yoshli (ayol) U.Z. sodir etgani aniqlangan.
Gumonlanuvchi sifatida tergov organlariga jalb etilgan U.Z. bilan Telegram orqali tanishib, unga o‘zini dorixonalarga dori yetkazib beruvchi tadbirkor ekanligi, agarda unga sarmoya kiritsa, berilgan pullarni dori savdosida aylantirib, ko‘rilgan foydadan vaqtida berishini aytgan. Aldov yo‘li bilan 9 mln so‘mni o‘tkazib olgandan so‘ng bergan vaʼdasini bajarmasdan, pullarni o‘z ehtiyojlariga sarflab yuborgan.
Mazkur holat yuzasidan JKning 168-moddasi 3-qismi (firibgarlik) bilan jinoyat ishi qo‘zg‘atilib, U.Z.ning sodir etilib fosh etilmay qolgan boshqa shu turdagi jinoyatlarga aloqadorligini tekshirish yuzasidan tezkor-surishtiruv ishlari olib borilmoqda.
Izoh (0)