Rossiyaning Samara viloyatida O‘zbekiston fuqarolarini olib ketayotgan avtobus YTHga uchrashi oqibatida ikki kishi halok bo‘lgan, 20 ga yaqin kishi jarohat olgandi. O‘zbekistonning Rossiyadagi elchixonasi ularning ahvoli haqida ma’lumot berdi.
Ma’lum qilinishicha, elchisi Botirjon Asadov Samara viloyati Sog‘liqni saqlash vazirligi rahbari Armen Benyan bilan birgalikda hududdagi tibbiyot muassasalarida bo‘lib, avtohalokatda jabrlangan fuqarolarga tibbiy yordam ko‘rsatilishi holatini o‘rgandi.
Samara viloyati sog‘liqni saqlash vazirining ta’kidlashicha, barcha jarohatlanganlar hududdagi 4 ta kasalxonada zarur tibbiy muolajalar olmoqda.
Avtohalokat 8-aprel kuni Samara viloyatidagi Ural—Muxanovo trassasida sodir bo‘lgandi. Chimkent—Nijniy Novgorod yo‘nalishi bo‘ylab harakatlanayotgan avtobus yo‘ldan chiqib, ag‘darilib ketgan. Tibbiy xizmat tezkorlik bilan ish olib borgan, voqea joyiga 10 nafar tez tibbiy yordam brigadasi va viloyat tabiiy ofatlar tibbiyot markazi brigadasi yetib borgan.
Ta’kidlanishicha, 18 nafar bemorning ahvoli o‘rta og‘ir, ikki nafari qoniqarli va yana ikki nafari hamon og‘ir deb baholanmoqda.
O‘zbekiston diplomatlari tibbiyot muassasalari ma’muriyati, Samara viloyati ichki siyosat boshqarmasi milliy va diniy siyosat bo‘limi boshlig‘i Mariya Kupsova bilan ham tibbiy yordamni tashkil etish masalalarini muhokama qilgan.
Elchi Botirjon Asadov viloyat hukumati va huquqni muhofaza qilish organlariga, shuningdek, avtohalokatda jabrlangan O‘zbekiston fuqarolariga yuqori malakali yordam ko‘rsatayotgani uchun Samara tibbiyot xodimlariga minnatdorlik bildirdi.
Izoh (0)