Россиянинг Самара вилоятида Ўзбекистон фуқароларини олиб кетаётган автобус ЙТҲга учраши оқибатида икки киши ҳалок бўлган, 20 га яқин киши жароҳат олганди. Ўзбекистоннинг Россиядаги элчихонаси уларнинг аҳволи ҳақида маълумот берди.
Маълум қилинишича, элчиси Ботиржон Асадов Самара вилояти Соғлиқни сақлаш вазирлиги раҳбари Армен Бенян билан биргаликда ҳудуддаги тиббиёт муассасаларида бўлиб, автоҳалокатда жабрланган фуқароларга тиббий ёрдам кўрсатилиши ҳолатини ўрганди.
Самара вилояти соғлиқни сақлаш вазирининг таъкидлашича, барча жароҳатланганлар ҳудуддаги 4 та касалхонада зарур тиббий муолажалар олмоқда.
Автоҳалокат 8 апрель куни Самара вилоятидаги Урал—Муханово трассасида содир бўлганди. Чимкент—Нижний Новгород йўналиши бўйлаб ҳаракатланаётган автобус йўлдан чиқиб, ағдарилиб кетган. Тиббий хизмат тезкорлик билан иш олиб борган, воқеа жойига 10 нафар тез тиббий ёрдам бригадаси ва вилоят табиий офатлар тиббиёт маркази бригадаси етиб борган.
Таъкидланишича, 18 нафар беморнинг аҳволи ўрта оғир, икки нафари қониқарли ва яна икки нафари ҳамон оғир деб баҳоланмоқда.
Ўзбекистон дипломатлари тиббиёт муассасалари маъмурияти, Самара вилояти ички сиёсат бошқармаси миллий ва диний сиёсат бўлими бошлиғи Мария Купсова билан ҳам тиббий ёрдамни ташкил этиш масалаларини муҳокама қилган.
Элчи Ботиржон Асадов вилоят ҳукумати ва ҳуқуқни муҳофаза қилиш органларига, шунингдек, автоҳалокатда жабрланган Ўзбекистон фуқароларига юқори малакали ёрдам кўрсатаётгани учун Самара тиббиёт ходимларига миннатдорлик билдирди.
Изоҳ (0)