Xorazmda yillik 14 foizdan kredit olib beraman, deya fuqarolarni chuv tushirib kelgan yigit qo‘lga olindi. Bu haqda IIV Kiberxavfsizlik markazi xabar berdi.
Qayd etilishicha, Bektemir tumanida yashovchi 62 yoshli (ayol) M.V. IIOga murojaat qilib, nomaʼlum shaxs tomonidan 1 million 696 ming so‘m miqdoridagi pullari firibgarlik yo‘li bilan o‘zlashtirilganini maʼlum qilgan.
Tezkor-qidiruv xizmati Kiberxavfsizlik bo‘linmalari xodimlari tomonidan o‘tkazilgan tadbirlar natijasida, mazkur jinoyatni Xorazm viloyati Tuproqqalʼa tumanida yashovchi 20 yoshli Y.A. sodir etgani aniqlangan.
Unga ko‘ra, Y.A., jabrlanuvchi M.V.ga yillik 14 foizli kredit olib beraman deya uni aldab, ishonchiga kirish orqali kartasidan o‘sha vaqtning o‘zida pullarni o‘zining foydalanuvida bo‘lgan bank plastik kartasiga o‘tkazib olgan va qo‘lga kiritilgan pul mablag‘ini ehtiyojlari uchun ishlatib yuborgan.
Mazkur holat yuzasidan Jinoyat kodeksining 168-moddasi (firibgarlik) 3-qismi “g” bandi bilan jinoyat ishi qo‘zg‘atilib, Y.A.ning sodir etilib fosh etilmay qolgan boshqa shu turdagi jinoyatlarga aloqadorligini tekshirish yuzasidan tezkor-surishtiruv ishlari olib borilmoqda.
Avvalroq Namanganda maktab o‘quvchisi ustozining plastik kartasidan 2 million so‘m yechib olgani to‘g‘risida xabar berilgandi. 2022-yil iyulda esa Andijonda 8-sinf o‘quvchisi o‘nlab fuqarolarning pullarini qo‘lga kiritib, PUBG o‘yiniga tikib yuborgani aniqlangan edi. Iyul boshida bo‘lsa, Buxoro viloyati G‘ijduvon tumanidagi bank filiali kassiri mijozlarning 41 ta bank kartalaridagi mablag‘ni o‘g‘irlagani ma’lum bo‘ldi.
Izoh (0)