Хоразмда йиллик 14 фоиздан кредит олиб бераман, дея фуқароларни чув тушириб келган йигит қўлга олинди. Бу ҳақда ИИВ Киберхавфсизлик маркази хабар берди.
Қайд этилишича, Бектемир туманида яшовчи 62 ёшли (аёл) М.V. ИИОга мурожаат қилиб, номаълум шахс томонидан 1 миллион 696 минг сўм миқдоридаги пуллари фирибгарлик йўли билан ўзлаштирилганини маълум қилган.
Тезкор-қидирув хизмати Киберхавфсизлик бўлинмалари ходимлари томонидан ўтказилган тадбирлар натижасида, мазкур жиноятни Хоразм вилояти Тупроққалъа туманида яшовчи 20 ёшли Й.А. содир этгани аниқланган.
Унга кўра, Й.А., жабрланувчи М.V.га йиллик 14 фоизли кредит олиб бераман дея уни алдаб, ишончига кириш орқали картасидан ўша вақтнинг ўзида пулларни ўзининг фойдаланувида бўлган банк пластик картасига ўтказиб олган ва қўлга киритилган пул маблағини эҳтиёжлари учун ишлатиб юборган.
Мазкур ҳолат юзасидан Жиноят кодексининг 168-моддаси (фирибгарлик) 3-қисми “г” банди билан жиноят иши қўзғатилиб, Й.А.нинг содир этилиб фош этилмай қолган бошқа шу турдаги жиноятларга алоқадорлигини текшириш юзасидан тезкор-суриштирув ишлари олиб борилмоқда.
Аввалроқ Наманганда мактаб ўқувчиси устозининг пластик картасидан 2 миллион сўм ечиб олгани тўғрисида хабар берилганди. 2022 йил июлда эса Андижонда 8-синф ўқувчиси ўнлаб фуқароларнинг пулларини қўлга киритиб, PUBG ўйинига тикиб юборгани аниқланган эди. Июль бошида бўлса, Бухоро вилояти Ғиждувон туманидаги банк филиали кассири мижозларнинг 41 та банк карталаридаги маблағни ўғирлагани маълум бўлди.
Изоҳ (0)