“Дам олиш кунлари ходимларни мажбурий ишга жалб қилиш жиноий жавобгарликкача олиб бориши мумкин” — ҳуқуқшунос

Ҳуқуқшунос Сайдали Мухторалиевнинг тушунтиришича, раҳбарлар ходимни дам олиш вақтида ишга жалб қилиши жуда нозик масала эканини билиши шарт.

“Гап шундаки, дам олиш ва ишланмайдиган байрам кунлари ходимларни асоссиз ишга жалб қилиш қонунбузарликдир.

Бунинг учун Маъмурий жавобгарлик тўғрисидаги кодекснинг 49-моддасига асосан БҲМнинг 10 баробаригача (3 миллион 30 минг сўм), агар бу ҳаракат бир йил давомида такроран содир этилган бўлса БҲМнинг 15 баробари (4 миллион 950 минг сўм ) миқдорида маъмурий жарима бор.

Агар раҳбариятнинг бу ҳаракатларида меҳнатга мажбурлаш аломатлари бўладиган бўлса, вазият янада оғирлашади. Бунда раҳбарлар Маъмурий жавобгарлик тўғрисидаги кодекснинг 51-моддасига асосан БҲМнинг 100 баробаригача (33 миллион сўм), агар бу педагогларга нисбатан содир қилинган бўлса, БҲМнинг 150 бараваригача (49 миллион 500 минг сўм) маъмурий жаримага тортилиши мумкин. Агар бу ҳуқуқбузарлик, яъни меҳнатга мажбурлаш учун маъмурий жазо қўлланилганидан кейин яна такрорланса, бу ёғи жиноятга тортиб кетади. Бундай ҳолатларда Жиноят кодексининг 148-2-моддасига асосан жиноий жавобгарлик чоралари қўлланилиши мумкин”, — дейди ҳуқуқшунос.

Сайдали Мухторалиевнинг алоҳида таъкидлашича, ташкилот раҳбарлари дам олиш, ишланмайдиган байрам кунларида ходимларни ишга чақиришда огоҳ бўлишлари лозим.