Yevropa Ittifoqi sudi 2022-yil fevral oyida Alfa Group mulkdorlari Mixail Fridman va Pyotr Avenga nisbatan qo‘yilgan shaxsiy sanksiyalarni bekor qildi. Tegishli qaror sud saytida e’lon qilindi.
Oligarxlar Rossiyaning Ukrainaga keng ko‘lamli bostirib kirishi boshlanganidan so‘ng darhol sanksiyalar ro‘yxatiga kiritilgandi. Bunga ularning Rossiya prezidenti Vladimir Putinga yaqinligi va Kremlning agressiyasini, shu jumladan, moliyaviy tomondan qo‘llab-quvvatlashlari asos bo‘ldi. Sanksiyalarni bekor qilish to‘g‘risidagi qarorda sud bu dalillar yetarli darajada isbotlanmaganini ta’kidladi.
“Ilgari surilgan asoslar ular Ukrainaning hududiy yaxlitligi, suvereniteti va mustaqilligiga putur yetkazuvchi yoki tahdid soluvchi harakatlar yoki siyosatni qo‘llab-quvvatlaganini yoki Qrimning anneksiya qilinishi, Ukrainadagi beqarorlik uchun javobgar rossiyalik shaxslarga moddiy yoki moliyaviy yordam ko‘rsatganini yoki ular orqali foyda ko‘rganini isbotlamadi”, — deyiladi sud qarorida.
Shu bilan birga, Reuters, Fridman va Avenga nisbatan 2023-yil mart oyida qabul qilingan sanksiyalarni uzaytirish to‘g‘risidagi qaror o‘z kuchida qolishini yozmoqda.
Mixail Fridman Buyuk Britaniyada yashagan, ammo 2023-yilning kuzida u mamlakatni tark etib, Isroilga ko‘chib o‘tgan. HAMAS harakati bilan oktyabr oyida boshlangan urush tufayli Fridman Moskvaga jo‘nab ketdi. Tadbirkor “hamma narsa tinchigach”, Isroilga qaytib, u yerda doimiy yashashni rejalashtirmoqda.
Izoh (0)