Европа Иттифоқи суди 2022 йил февраль ойида Alfa Group мулкдорлари Михаил Фридман ва Пётр Авенга нисбатан қўйилган шахсий санкцияларни бекор қилди. Тегишли қарор суд сайтида эълон қилинди.
Олигархлар Россиянинг Украинага кенг кўламли бостириб кириши бошланганидан сўнг дарҳол санкциялар рўйхатига киритилганди. Бунга уларнинг Россия президенти Владимир Путинга яқинлиги ва Кремлнинг агрессиясини, шу жумладан, молиявий томондан қўллаб-қувватлашлари асос бўлди. Санкцияларни бекор қилиш тўғрисидаги қарорда суд бу далиллар етарли даражада исботланмаганини таъкидлади.
“Илгари сурилган асослар улар Украинанинг ҳудудий яхлитлиги, суверенитети ва мустақиллигига путур етказувчи ёки таҳдид солувчи ҳаракатлар ёки сиёсатни қўллаб-қувватлаганини ёки Қримнинг аннексия қилиниши, Украинадаги беқарорлик учун жавобгар россиялик шахсларга моддий ёки молиявий ёрдам кўрсатганини ёки улар орқали фойда кўрганини исботламади”, — дейилади суд қарорида.
Шу билан бирга, Reuters, Фридман ва Авенга нисбатан 2023 йил март ойида қабул қилинган санкцияларни узайтириш тўғрисидаги қарор ўз кучида қолишини ёзмоқда.
Михаил Фридман Буюк Британияда яшаган, аммо 2023 йилнинг кузида у мамлакатни тарк этиб, Исроилга кўчиб ўтган. ҲАМАС ҳаракати билан октябрь ойида бошланган уруш туфайли Фридман Москвага жўнаб кетди. Тадбиркор “ҳамма нарса тинчигач”, Исроилга қайтиб, у ерда доимий яшашни режалаштирмоқда.
Изоҳ (0)