Pentagon Ukraina armiyasiga Starlink aloqa terminallarini yetkazib bergani uchun Ilon Maskning SpaceX kompaniyasiga 23 million dollar to‘ladi, deb xabar bermoqda Bloomberg nomi oshkor etilmagan amerikalik mulozimga tayanib.
Agentlik suhbatdoshi shartnomani “AQSH Ukrainaga ko‘rsatayotgan xavfsizlik yordamining muhim qismi” deb atadi. Starlink terminallarini yetkazib berish bo‘yicha shartnoma 2023-yilning iyunidan 2024-yilning mayigacha amal qiladi. Shartnoma uzaytiriladimi yoki yo‘qmi, hozircha noma’lum.
Bloomberg taʼkidlashicha, bu 23 million dollar “Maskning kosmik tadqiqot korporatsiyasi AQSHning baʼzi sunʼiy yo‘ldoshlarini uchirishda asosiy hamkor sifatida olgan yuzlab million dollarlar bilan solishtirganda arzimas mablag‘”.
Rossiya qo‘shinlari Ukrainaga kirgandan so‘ng, SpaceX Ukrainaga kamida 24 ming Starlink stantsiyalarini taqdim etdi. 2022-yil dekabrida Kiyev yana 10 mingta shunday qurilma olishini e’lon qildi. 2023-yil fevralida SpaceX Ukraina harbiylarining dronlarni boshqarish uchun Starlink sun’iy yo‘ldosh aloqalariga kirishini chekladi.
O‘sha yilning sentabr oyida CNN telekanali Ilon Mask xodimlariga 2022-yilda Ukraina harbiylarining Rossiya harbiy dengiz flotiga qarshi hujumlarini bartaraf etish uchun Starlink sun’iy yo‘ldoshlarini Qrim qirg‘oqlari yaqinida yopish haqida yashirin ko‘rsatma bergani haqida xabar bergan edi.
2024-yil fevral oyida Defence One jurnali Ukraina manbalariga tayanib, Rossiya qo‘shinlari Starlink aloqa xizmatlaridan bir necha oy davomida foydalanayotgani haqida xabar bergan edi. Ilon Mask SpaceX Rossiyaga Starlink terminallarini bevosita yoki bilvosita sotmaganini ta’kidladi. Kreml, shuningdek, bu terminallardan Rossiyada foydalanilmayotganini taʼkidladi.
Izoh (0)