1-aprel kuni Lego o‘yinchoq konstruktorlar kompaniyasi ijtimoiy tarmoqlarda “Yaxshi bo‘lish osonmi” multfilmi qahramoni — Tim ismli minion shaklidagi gigant o‘yinchoq to‘plamini taqdim etdi.
Xabarda ta’kidlanishicha, yangi Supersized Tim™ Minion nomli to‘plam yuz mingdan ortiq konstruktor detallaridan iborat bo‘ladi. Ammo Lego muxlislari bu quvonchli yangilikdan xursand bo‘lishga ulgurmay, bu xabar shunchaki 1-aprel hazili ekani ma’lum bo‘ldi.
Biroz vaqtdan so‘ng Lego haqiqatda yangi konstruktorlar to‘plamini e’lon qildi. “Yaxshi bo‘lish osonmi” franshizasi ikki yirik kompaniyani birlashtirdi: Illumination va Universal Products & Experiences bilan hamkorlikda Lego kompaniyasi Gryu va uning sariq do‘stlari haqidagi to‘rtinchi multfilm premyerasi uchun maxsus yaratilgan yangi o‘yinchoqlar to‘plamini taqdim etadi.
Film namoyishi arafasida ikkita to‘plam sotuvga chiqariladi. Birinchi to‘plamga Gru, Lyusi, ularning asrab olingan qizlari Margo, Edit va Agnes, yaqinda tug‘ilgan o‘g‘li va albatta minionlar kiradi. Ikkinchi to‘plam esa multfilm bosh qahramoni va uning sariq do‘stlaridan iborat bo‘ladi.
“Yaxshi bo‘lish osonmi” filmining to‘rtinchi qismi premyerasi butun dunyo bo‘ylab 3-iyunda bo‘lib o‘tadi. Unda Gryu hamda uning turmush o‘rtog‘i Lyusi va katta oilaning yangi sarguzashtlari haqida hikoya qilinadi. Qahramonlar yovuz Maksim va uning sevgilisi Valentina bilan to‘qnash keladi.
Izoh (0)