Lego konstruktorlari dunyodagi eng mashhur o‘yinchoqlardan biridir. Uning plastik g‘ishtlari bilan bolalar bir necha soat o‘ynashi hamda rang va shakli yordamida turfa g‘oyalarni osongina amalga oshirishi mumkin.
Bolalikdan Lego’ga bo‘lgan muhabbat chexiyalik Milosh Krjechekda o‘yinchoqning barcha turlarini to‘plash fikrini uyg‘otdi. Hozirda bu xobbiga butun umrini bag‘ishlagan kolleksionerning bir nechta Lego muzeylari bor.
Milosh o‘zining ilk to‘plamini 5 yoshida Yangi yil bayrami arafasida hadyaga olgan. O‘sha kundan boshlab u turli Lego konstruktorlarini kolleksiya qilib kelmoqda. Bugun u 6000 dan ortiq turdagi konstruktorlar egasi bo‘lib, ular ichida qiymati bir necha ming dollarga yetadigan to‘plamlar ham mavjud. Uzoq muddatli xobbisi sababli chexiyalik kolleksioner Ginnes rekordlari kitobiga kiritilgan.
“To‘plamimdagi deyarli 90 foiz konstruktorlarni o‘zim xarid qilganman, lekin menga sovg‘a tariqasida ham Lego berib turishadi va bu albatta meni xursand qiladi”, — deydi Milosh.
Katta sig‘imdagi Lego o‘yinchoqlarini uyda saqlashning imkoni yo‘q, shu sababli Milosh 4 ta shaharda o‘zining maxsus muzeylarini ochgan.
Izoh (0)