Хитой—Қирғизистон—Ўзбекистон темирйўли қурилиши 8 миллиард долларга баҳоланмоқда. Бу ҳақда Қирғизистон Вазирлар Маҳкамаси раиси Оқилбек Жапаровга таяниб 24.kg хабар берди.
Жапаровнинг сўзларига кўра, тегишли сумма дастлабки нарх ҳисобланади. Қирғизистон, Хитой ва Ўзбекистон темирйўл қурилишини бошлашга тайёргарлик кўриш ишларини якунлаган. Барча процедуралар бажарилган. Ишлар жорий йилда бошланиши кутилмоқда. Ҳозирда лойиҳанинг техник-иқтисодий асосларини амалга ошириш кетмоқда.
Ўзбекистон—Қирғизистон—Хитой темирйўли қурилиши лойиҳаси бўйича уч давлат ўртасида ҳамкорлик тўғрисидаги битим 2022 йил сентябрь ойида Самарқандда имзоланганди. Ҳужжатда лойиҳанинг техник-иқтисодий асосларини ўтган йилнинг биринчи ярмида тайёрлаш кўзда тутилганди.
2023 йил декабрь ойида Хитойдан келган мутахассислар янги темирйўл йўналишида дала ишларини якунлаган. 20 йилдан ортиқ муҳокама қилинаётган лойиҳанинг амалга оширилиши Хитойдан Ўзбекистон орқали Европа ва “Жанубий йўлак” орқали Форс кўрфази давлатларига савдо ва транспорт географиясини кенгайтириш учун асос бўлиб хизмат қилиши кутилмоқда.
Изоҳ (0)