Rossiya harbiy samolyoti 28-mart kuni Qrim yarimoroli sohili yaqinidagi dengizga qulab tushdi. Bu haqda The Moscow Times nashri xabar berdi.
Ijtimoiy tarmoqlarda tarqalgan videoda osmondan alanga ichida pastga qulayotgan samolyot aks etgan. Xabarlarga ko‘ra, halokatdan so‘ng uchuvchi parashyutdan sakrab, tirik qolgan.
“Uchuvchi katapulta qilgan. Uni Sevastopol qutqaruv xizmati xodimlari qirg‘oqdan 200 metr uzoqlikdagi manzildan topgan. Uning hayoti hozir xavf ostida emas”, — deya maʼlumot bergan Sevastopol gubernatori Mixail Razvojayev.
Uchuvchining halokatiga nima sabab bo‘lgani hozircha nomaʼlum. Rasmiy tashkilotlar halokat sabablarini o‘rganayotganini maʼlum qilgan.
Sharqiy Ukrainada urush boshlangandan beri Qrim yarimoroli atrofida bir necha bor qiruvchi samolyot halokati sodir bo‘lgan. 2022-yilning bahorida Ukraina Rossiyaning Qrimdagi aviabazasini ham bombardimon qilgan edi.
Izoh (0)