Namangandagi xalqaro gullar festivaliga 7 milliondan ortiq mehmon kelishi kutilmoqda

Namanganda joriy yilgi 63-xalqaro gullar festivaliga 7 milliondan ortiq mehmon kelishi, ulardan 300 ming nafari xorijiy sayyohlar bo‘lishi kutilmoqda. Bu haqda viloyat hokimining o‘rinbosari Botir Nuriddinov maʼlum qildi, deya xabar beradi “Daryo” muxbiri Azizbek Abduvaliyev.

Festival 19-maydan 23-iyungacha, qariyb 40 kun davom etadi. Tadbirni anʼanaviy tarzda gullar bilan bezatilgan avtomobillar paradi boshlab beradi.

“Festival doirasida modalar haftaligi, adabiyot bayrami, hunarmandlar yarmarkasi, osh chempionati, askiya va retro-qo‘shiqlar kechalari, avto va dron-shoular, shotokan-karate bo‘yicha Osiyo chempionati, etnosport musobaqalari, lavanda sayli o‘tkaziladi. Tarix, turizm, jadidchilik, arxitektura, suv resurslari, oziq-ovqat xavfsizligi. biologik xilma-xillik va bandlik yo‘nalishlarida o‘nga yaqin xalqaro forum va ilmiy-amaliy konferensiyalar bo‘lib o‘tadi”, — deydi Botir Nuriddinov.

O‘tgan galgi festival kunlari Namanganda jahon estradasi yulduzlari turkiyalik Rafet el Roman, ozarbayjonlik Tolib Tale va Zaynab Hasaniy ishtirokida konsertlar bo‘lib o‘tgan va ular yaxshigina shov-shuv bo‘lgandi.

“Daryo” muxbirining bu gal kimlar kutilayotgani haqidagi savoliga javoban Botir Nuriddinov hozirda bir qator mashhur xonandalar va Bollivud yulduzlari bilan muzokaralar olib borilayotgani, ularning nomlari festival mehmonlari uchun o‘ziga xos syurpriz bo‘lishini taʼkidladi.