G‘arb razvedka agentliklari Xitoyning Yaman husiylariga beixtiyor yordam berayotganini ma’lum qildi.
Xitoy hukumati Eron neftini sotib olmoqda, bu neftni esa Islom inqilobi qo‘riqchilari korpusining maxsus harbiy qismi — “Quds” sotyapti. Politico manbalarining aytishicha, “Quds” husiylarni tayyorlaydi va moliyalashtiradi.
Ismi oshkor etilmagan G‘arb mulozimining so‘zlariga ko‘ra, Xitoy bu “qo‘llab-quvvatlashni” beixtiyor qiladi, chunki Pekinning o‘zi husiylarning Qizil dengizdagi harakatlaridan aziyat chekmoqda.
“Menimcha ular o‘zlari o‘tirgan daraxt shoxini kesib tashlashayotganini tushunishmayapti”, — dedi u Politico nashriga. Xitoy hukumati Politico’ning izoh so‘rab yo‘llagan so‘roviga javob bermadi.
Yaman husiylari 2023-yilning kuzidan beri Qizil dengizdagi AQSH va Britaniya kemalariga, shuningdek, Isroil bilan bog‘liq kemalarga hujum qilmoqda. Ular Isroil bilan urushda Falastinning HAMAS harakatini qo‘llab-quvvatlamoqda. Husiy vakillari Xitoy va Rossiya kemalariga hujum qilmaslikka va’da berishdi.
Biroq 24-mart kuni AQSH Markaziy qo‘mondonligi isyonchilar Panama bayrog‘i ostida suzib ketayotgan Xitoyning “Huang Pu” tankeriga raketa bilan hujum qilgani haqida xabar berdi. Kema katta zarar ko‘rmadi. X ijtimoiy tarmog‘ida o‘z hujumlari haqida xabar bergan husiylarning o‘zlari bu holatga izoh bermagan. Xitoy hukumati ham bu voqeaga izoh bermadi.
Izoh (0)