Navoiy viloyati, Xatirchi tumanida yashovchi 33 yoshli Sh.S. ichki ishlar organlariga murojaat qilib, bank kartasidan 1,3 mln so‘m miqdoridagi pul mablag‘lari nomaʼlum shaxs tomonidan o‘zlashtirilganini maʼlum qilgan. Bu haqda Kiberxavfsizlik markazi matbuot xizmati xabar berdi.
Maʼlum qilinishicha, o‘tkazilgan tezkor-qidiruv tadbirlari natijasida mazkur jinoyatni Farg‘ona viloyati, O‘zbekiston tumanida yashovchi 23 yoshli S.Yu. sodir etgani aniqlangan.
Gumonlanuvchi sifatida tergov harakatlariga jalb etilgan, S.Yu. OLX platformasida iPhone X sotiladi, deya yolg‘on eʼlon joylashtirgan va bu eʼlonga ishongan jabrlanuvchi Sh.S. bilan telefon orqali gaplashib, uni ishonchiga kirish orqali, oldindan 1,3 mln so‘m miqdoridagi pullarni o‘zining foydalanuvida bo‘lgan bank kartasiga o‘tkazib olgan va yozishmalarni o‘chirib yuborib, uning qo‘ng‘iroqlariga javob bermay, qora ro‘yxatga kirgazib qo‘ygan.
Mazkur holat yuzasidan JKning 168-moddasi 3-qismi “g” bandi (firibgarlik axborot tizimidan, shu jumladan axborot texnologiyalaridan foydalanib sodir etilgan bo‘lsa) bilan jinoyat ishi qo‘zg‘atilib, S.Yu.ning sodir etilib, fosh etilmay qolgan boshqa shu turdagi jinoyatlarga aloqadorligini tekshirish maqsadida tergov, tezkor-qidiruv harakatlari davom ettirilmoqda.
Izoh (0)