Toshkent shahrida yolg‘on e’lonlar orqali fuqarolarni chuv tushirish bilan shug‘ullanib kelgan shaxs qo‘lga olindi, deb xabar beradi IIV JQD Kiberxavfsizlik markazi.
Qayd etilishicha, Uchtepa tumanida yashovchi 33 yoshli B.N. ariza bilan murojaat qilib, “Olx” platformasida xonadon ijarasi to‘g‘risidagi eʼlon bo‘yicha nomaʼlum shaxsga 950 ming so‘m pul mablag‘larini o‘tkazib berganidan so‘ng aldanib qolganini maʼlum qilgan.
Olib borilgan tezkor-surishtiruv ishlari natijasida, pullarni o‘zlashtirgan shaxs muqaddam javobgarlikka tortilgan, Toshkent shahar Yashnobod tumanida yashovchi, 31 yoshli Sh.N. ekani aniqlangan.
Unga ko‘ra, Sh.N., B.N.dan tashqari, “Olx” platformasida xonadon ijarasi to‘g‘risidagi yolg‘on eʼlon bo‘yicha uy qidirgan o‘ndan ortiq fuqarolarni aldab, pul mablag‘larini shaxsiy ehtiyojlari uchun ishlatib yuborgani maʼlum bo‘ldi.
Holat bo‘yicha Jinoyat kodeksining 168-modda (firibgarlik) 3-qismi bilan jinoyat ishi qo‘zg‘atilib, tergov harakatlari olib borilmoqda. Qonunga muvofiq, Sh.N. tomonidan sodir etilgan jinoiy harakatlar uchun 5 yildan 8 yilgacha ozodlikdan mahrum qilish jazosi nazarda tutilgan.
Mart boshlarida Toshkent shahrida kvartira ijaraga berilishi to‘g‘risida yolg‘on ma’lumotlarni joylashtirib, fuqarolarni chuv tushirib yurgan shaxsga nisbatan jinoyat ishi qo‘zg‘atilgandi.
Izoh (0)