Dubaydagi Burj Xalifa osmono‘par binosi Crocus City Hallʼdagi terakt qurbonlari xotirasiga hurmat sifatida Rossiya bayrog‘i ranglarida yoritildi. Bu haqda “TASS” nashri xabar berdi.
Dunyodagi eng baland binoning yuksak qismida arab va ingliz tillarida “Birlashgan Arab Amirliklari Rossiyani qo‘llab-quvvatlaydi” degan yozuv hosil qilingan. Ushbu tashabbus Dubay hukumati va Emaar kompaniyasi tomonidan tashkil etilib, bir necha daqiqa davom etgan.
Shuningdek, Xalifa universiteti, ADNOC neft kompaniyasi, ADNEC ko‘rgazmalar kompaniyasi va boshqa baʼzi muhim binolar ham Rossiya bayrog‘i ranglarida yoritilgan.
“Ushbu birdamlik tashabbusi Birlashgan Arab Amirliklarining beqarorlikka yo‘naltirilgan va xalqaro huquqqa mos kelmaydigan zo‘ravonlik va terrorizmning barcha shakllariga keskin qarshiligini tasdiqlaydi. Bu, shuningdek, BAA rahbarlari va aholisi Rossiya va uning xalqini terroristik hujumlarga qarshi kurashda qo‘llab-quvvatlayotganidan dalolat beradi”, — deya bayonot bergan hukumatga yaqin manba.
Maʼlumot o‘rnida, 22-mart kuni kechki payt Moskva yaqinidagi Crocus City Hall majmuasida terakt sodir etilgan edi. Rossiya Tergov qo‘mitasi maʼlumotlariga ko‘ra, hozirda halok bo‘lganlar soni 137 kishini tashkil etadi. Moskva viloyati Sog‘liqni saqlash vazirligi 182 kishi jarohatlanganini maʼlum qildi. Teraktga aloqadorlikda gumon qilingan 11 kishi, jumladan, Moskva janubi-g‘arbidagi Bryansk viloyatida Ukraina chegarasini kesib o‘tib, boshpana izlashga uringan to‘rt nafar qurolli shaxs qo‘lga olingan. Rossiya prezidenti Vladimir Putin Crocus City Hallʼga hujum ortida turganlarning barchasini aniqlash va jazolashga vaʼda bergan va 24-martni qurbonlar uchun milliy motam kuni deb eʼlon qilgan.
Izoh (0)