Дубайдаги Бурж Халифа осмонўпар биноси Crocus City Hall’даги теракт қурбонлари хотирасига ҳурмат сифатида Россия байроғи рангларида ёритилди. Бу ҳақда “ТАСС” нашри хабар берди.
Дунёдаги энг баланд бинонинг юксак қисмида араб ва инглиз тилларида “Бирлашган Араб Амирликлари Россияни қўллаб-қувватлайди” деган ёзув ҳосил қилинган. Ушбу ташаббус Дубай ҳукумати ва Emaar компанияси томонидан ташкил этилиб, бир неча дақиқа давом этган.
Шунингдек, Халифа университети, ADNOC нефть компанияси, АDNEC кўргазмалар компанияси ва бошқа баъзи муҳим бинолар ҳам Россия байроғи рангларида ёритилган.
“Ушбу бирдамлик ташаббуси Бирлашган Араб Амирликларининг беқарорликка йўналтирилган ва халқаро ҳуқуққа мос келмайдиган зўравонлик ва терроризмнинг барча шаклларига кескин қаршилигини тасдиқлайди. Бу, шунингдек, БАА раҳбарлари ва аҳолиси Россия ва унинг халқини террористик ҳужумларга қарши курашда қўллаб-қувватлаётганидан далолат беради”, — дея баёнот берган ҳукуматга яқин манба.
Маълумот ўрнида, 22 март куни кечки пайт Москва яқинидаги Crocus City Hall мажмуасида теракт содир этилган эди. Россия Тергов қўмитаси маълумотларига кўра, ҳозирда ҳалок бўлганлар сони 137 кишини ташкил этади. Москва вилояти Соғлиқни сақлаш вазирлиги 182 киши жароҳатланганини маълум қилди. Терактга алоқадорликда гумон қилинган 11 киши, жумладан, Москва жануби-ғарбидаги Брянск вилоятида Украина чегарасини кесиб ўтиб, бошпана излашга уринган тўрт нафар қуролли шахс қўлга олинган. Россия президенти Владимир Путин Crocus City Hall’га ҳужум ортида турганларнинг барчасини аниқлаш ва жазолашга ваъда берган ва 24 мартни қурбонлар учун миллий мотам куни деб эълон қилган.
Изоҳ (0)