Бухоро вилоятининг Когон туманида автобус ва юк машинаси иштирокида ЙТҲ содир бўлгани, ағдарилган автобус ичида мактаб ўқувчилари бўлгани ҳақида хабар берилган эди. Бош прокуратура матбуот хизмати раҳбари Ҳаёт Шамсутдинов ҳолат бўйича маълумот берди.
Маълум қилинишича, ҳодиса юзасидан Бухоро вилояти ички ишлар тергов органи томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, дарҳол терговга киришилган.
Бундан ташқари, Бухоро вилояти прокуратураси томонидан ўтказилган текширишда айрим мансабдор шахслар мактаб болаларини автобусда ташиш ва ҳамроҳлик қилиш ишларини ташкил қилишда қўпол қонун бузилиши ҳолатларига йўл қўйганликлари аниқланган.
Ушбу ҳолат юзасидан Жиноят кодексининг 207-моддаси (мансабга совуққонлик билан қараш) билан жиноят иши қўзғатилган.
“Тергов ҳаракатлари ҳар томонлама, тўлиқ ва холисона ўтказилиши ва натижаси бўйича қонуний қарор қабул қилиниши таъминланади”, — дейилади хабарда.
Изоҳ (0)