Qatar Airways kompaniyasi dunyodagi birinchi sunʼiy intellektga asoslangan kabina ekipaji tizimini joriy etganini eʼlon qildi. Bu haqda Gulf News nashri xabar berdi.
Xabarda aytilishicha, kompaniya Sama 2.0 tizimini ishga tushirgan. Kelgusi yilda kompaniya 15 ta global yo‘nalishga parvozlar chastotasini oshirishni maqsad qilgan. Shunga mos ravishda, parvozlar tizimida sunʼiy intellekt integratsiyasi ham oshadi.
Qatar Airways kompaniyasi Dohadagi Hamad xalqaro aeroportidan 170 dan ortiq yo‘nalishlarga parvozlar tashkil qiladi. Shu yilning yozidan boshlab Germaniyaning beshta muhim yo‘nalishidan biri bo‘lgan Gamburgga parvozlar joriy etiladi. Berlinga haftalik reyslar soni 14 dan 18 taga ko‘paytiriladi. Butun Germaniyaga haftalik reyslar soni 71 ta ga yetkazilishi mo‘ljallangan. Kompaniya ushbu jarayonlarda ishchi xodimlar va rahbariyat yelkasiga tushadigan yuklamani sunʼiy intellekt yordami bilan yengillatmoqchi.
Qatar Airways umidlarini bog‘layotgan Sama 2.0 tizimi gologrammali displey vositasida ITB Berlin 2024 innovatsion forumida eʼlon qilingan. Bu ilg‘or sunʼiy intellekt kabina ekipaji bo‘lib, aviakompaniyaning QVerse platformasi orqali yo‘lovchilar bilan muloqot qilib, sayohat tajribalarini o‘rganadi.
“Innovatsiyalar missiyamizning muhim poydevoridir va yangi va takomillashtirilgan Sama tizimi bilan biz raqamli tajribamizni oshirish yo‘lida yana bir aniq qadam tashlamoqdamiz. Mavjud yo‘nalishlar tarmog‘imizdagi reyslarning ko‘payishi havo qatnoviga bo‘lgan talabning ortib borayotganini ko‘rsatadi. Turizm va savdo imkoniyatlarini yaxshilash uchun mamlakatlar va insonlarni birlashtirish zaruratini taqozo etadi”, — deya yangi tizimga munosabatini bildirgan Qatar Airways Group bosh direktori Badr Muhammad Al-Meer.
Izoh (0)