Saudiya Arabistoni fuqarosi Abdulla Al Qahtoniy 17-mart kuni parashyutdan sakrab, havoda iftorlik qildi. Bu haqda Gulf News nashri xabar berdi.
Xabarda aytilishicha, ekstremal sport vakili iftorlik qilish anʼanasini tom maʼnoda yangi cho‘qqiga olib chiqishni xohlagan. Bu qiziqish esa havoda muallaq holda iftorlik qilishga undadi.
Al Qahtoniy Saudiya Arabistoni janubidagi baland tog‘lardan parashyutda sakragan va maqsadini amalga oshirgan. Shu bilan bir paytda, Qahtoniy o‘z harakatlarini jonli efir orqali muxlislariga ulashib turgan. Saudiya fuqarosining amalga oshirgan ishi ijtimoiy tarmoqlarning arab segmentida tezda mashhurlikka erishgan.
Tarqalgan videoda sarguzasht ixlosmandi ochiq osmon fonida anʼanaviy iftorlik taomlari bo‘lgan qaymoq va xurmodan isteʼmol qilayotganini ko‘rish mumkin.
“Mening bugungi iftorligim shu yerda bo‘ldi. Parashyut plitalarini muvozanatda ushlab turish oson bo‘lmadi, lekin xayriyatki, men buni uddaladim. Bugungi iftorlik barchasidan o‘zgacha”, — degan Saudiya Arabistoni fuqarosi Abdulla Al Qahtoniy.
Izoh (0)