Qatar Airways компанияси дунёдаги биринчи сунъий интеллектга асосланган кабина экипажи тизимини жорий этганини эълон қилди. Бу ҳақда Gulf News нашри хабар берди.
Хабарда айтилишича, компания Sama 2.0 тизимини ишга туширган. Келгуси йилда компания 15 та глобал йўналишга парвозлар частотасини оширишни мақсад қилган. Шунга мос равишда, парвозлар тизимида сунъий интеллект интеграцияси ҳам ошади.
Qatar Airways компанияси Доҳадаги Ҳамад халқаро аэропортидан 170 дан ортиқ йўналишларга парвозлар ташкил қилади. Шу йилнинг ёзидан бошлаб Германиянинг бешта муҳим йўналишидан бири бўлган Гамбургга парвозлар жорий этилади. Берлинга ҳафталик рейслар сони 14 дан 18 тага кўпайтирилади. Бутун Германияга ҳафталик рейслар сони 71 та га етказилиши мўлжалланган. Компания ушбу жараёнларда ишчи ходимлар ва раҳбарият елкасига тушадиган юкламани сунъий интеллект ёрдами билан енгиллатмоқчи.
Qatar Airways умидларини боғлаётган Sama 2.0 тизими голограммали дисплей воситасида ITB Berlin 2024 инновацион форумида эълон қилинган. Бу илғор сунъий интеллект кабина экипажи бўлиб, авиакомпаниянинг QVerse платформаси орқали йўловчилар билан мулоқот қилиб, саёҳат тажрибаларини ўрганади.
“Инновациялар миссиямизнинг муҳим пойдеворидир ва янги ва такомиллаштирилган Sama тизими билан биз рақамли тажрибамизни ошириш йўлида яна бир аниқ қадам ташламоқдамиз. Мавжуд йўналишлар тармоғимиздаги рейсларнинг кўпайиши ҳаво қатновига бўлган талабнинг ортиб бораётганини кўрсатади. Туризм ва савдо имкониятларини яхшилаш учун мамлакатлар ва инсонларни бирлаштириш заруратини тақозо этади”, — дея янги тизимга муносабатини билдирган Qatar Airways Group бош директори Бадр Муҳаммад Ал-Меер.
Изоҳ (0)