Rossiya prezidenti matbuot kotibi Dmitriy Peskov o‘tgan saylovlarning “noqonuniyligi” haqidagi muhokamalarni absurd deb atadi. Kreml AQSHning Rossiyadagi saylovlar erkin bo‘lmagani haqidagi bayonotlariga qo‘shilmaydi va Vashington pozitsiyasiga quloq solish niyatida emas. Bu haqida Peskov xabar qildi.
Kreml vakilining taʼkidlashicha, Vladimir Putin bir kun avval AQSH va G‘arb davlatlarining bunday baholarini “kutilgan munosabat” deb atagan. “De-fakto Amerika Qo‘shma Shtatlari Ukrainadagi urushga chuqur aralashgan davlat ekanligini hisobga olsak, bu biz tinglashga tayyor bo‘lgan fikr emas”, — dedi Peskov matbuot muloqoti chog‘ida.
Kreml vakili xorijdagi Rossiya muxolifatining saylovlarni noqonuniy deb tan olish g‘oyalariga ham izoh berdi. Ayniqsa, Yuliya Navalnaya G‘arb hukumatlariga shunday murojaat qildi. Peskovning taʼkidlashicha, mamlakatni tark etganlar orasida ko‘pchilik “vatanidan butunlay uzilgan”. Uning fikriga ko‘ra, Yuliya Navalnaya “o‘z ildizlarini yo‘qotayotgan odamlar toifasiga mansub”.
“Mamlakatimizdagi saylovlarning noqonuniyligi haqida gapiradigan bo‘lsak, unda prezident Putin uchun berilgan mamlakatimiz aholisining 87 foiz ovozining noqonuniyligi haqida gapirishimiz kerak bo‘ladi. Bu absurd. Biz bunga shunday yondashamiz”, — deya qo‘shimcha qildi Peskov.
Izoh (0)