Afg‘oniston muvaqqat hukumati Haj va diniy ishlar vazirligining yuqori martabali delegatsiyasi bugun, 16-mart sanasida O‘zbekiston musulmonlari idorasi raisi Shayx Nuriddin Xoliqnazar taklifiga binoan O‘zbekistonga tashrif buyurdi. Shuningdek, 12—13-mart kunlari esa O‘zbekiston tashqi ishlar vaziri Baxtiyor Saidov Kobulda “Tolibon”ning bir qancha rahbarlari bilan uchrashgan edi.
Siyosatshunos Farhod Karimov va Xalqaro iqtisodiyot bo‘yicha mutaxassis Qobiljon Isayev O‘zbekiston hukumatining “Tolibon” bilan olib borayotgan munosabatlari to‘g‘risida “Daryo”ga o‘z fikr-mulohazalarini bildirib o‘tdi.
Xalqaro iqtisodiyot bo‘yicha mutaxassis, “Uyg‘un taʼlim” loyihasi asoschisi Qobiljon Isayevning taʼkidlashicha, istiqbolda Toshkent Markaziy Osiyodagi neytral zona koloridini olish uchun eng yaqin nomzod shahar bo‘ladi.
Bir narsani anglash kerakki, mazkur taklif “Tolibon” bilan sohaviy diplomatiyani taqozo etadi. Ularning birinchi marta Toshkentga kelishi emas. Yaxshi netvorking ko‘zlanmoqda, sovg‘a salomlar va hokazo, ularning diniy taʼsiridan siyosiy taʼsiri beqarordek ko‘rinish hosil qilgan. Din borasida esa davlat asosiy yo‘nalishlarni taʼsirchan nazoratda qoldiradi.Toshkent — Markaziy Osiyodagi neytral zona koloridini olish uchun eng yaqin nomzod shahar. Diniy eʼtiqodda talashib o‘tirishmaydi. Faqat mavjud eʼtiqodni anglosaksoncha olib boramizmi yoki ruscha taʼsirchan cheklov tamoyillarimi degan mavzularga ko‘chadi. Kelishib olishadi, yaxshi sayohat va netvorking, hozir ularga kerak”, — deydi Qobiljon Isayev.
Afg‘onshunos Suhrob Bo‘ronov esa “Tolibon” bilan bu sohada yaqinlashish qanchalik to‘g‘ri”, degan savolni jamoatchilik oldiga tashladi.
Siyosatshunos Farhod Karimov fikr bildirishicha, Afg‘oniston borasida bir qancha muammolar mavjud va bu muammolarni vaqtni boy bermasdan tezroq hal qilish kerak.
“Bugun O‘zbekiston “Tolibon”ni butun dunyo tan olishini kutib tura olmaydi. Hozir “Tolibon” Afg‘onistonni amalda boshqarmoqda. Afg‘on xalqi ham, siyosiy elitasi ham qaysidir maʼnoda “Tolibon”ga ergashmoqda. “Tolibon” bu hududda barqarorlikni o‘rnatdi.
Afg‘oniston bilan bog‘liq bir qancha yechilmagan masalalar bor. Masalan, transchegaraviy daryolardan foydalanish va Afg‘oniston orqali Pokiston portlariga chiqadigan temiryo‘l masalasi. O‘zbekiston uchun bu hayotiy masalalar. O‘zbekiston kutib tura olmaydi” – deydi siyosatshunos.
Farhod Karimovning qo‘shimcha qilishicha, “Tolibon” bilan aloqalar qanchalik O‘zbekiston uchun zarur bo‘lsa, “Tolibon” uchun ham O‘zbekiston bilan munosabatlar shunchalik zarur.
“Tolibon” bilan munosabatlarga obyektiv qarash va to‘g‘ri baho berish lozim. O‘zbekiston hukumatining bunday faolligiga qoyil qolish kerak. Chunki ular ishni hal qilishmoqda. O‘zbekistonga “Tolibon” bilan aloqalar qanchalik zarur bo‘lsa, “Tolibon” uchun ham O‘zbekiston bilan munosabatlar shunchalik zarur. Mana shu ikki tomonlama manfaatdorlik, o‘rtada tiyib turuvchi mexanizm sifatida xizmat qiladi. Bugun afg‘on xalqi kimga ergashsa, O‘zbekiston o‘sha bilan gaplashadi”, – dedi siyosatshunos Farhod Karimov.
Maʼlumot uchun, Toshkentga kelgan “Tolibon” delegatsiyasiga haj va vaqf ishlari vaziri Nur Muhammad Soqib boshchilik qilgan. Tomonlar afg‘on va o‘zbek din olimlari o‘rtasidagi ikki tomonlama munosabatlar va o‘zaro hamkorlikni rivojlantirish, masjid, madrasa va diniy taʼlim masalalari bo‘yicha tajriba almashishni muhokama qilgan.
Bundan tashqari, “Tolibon” delegatsiyasi Toshkent, Buxoro va Samarqanddagi masjid va madrasalarga tashrif buyurishi rejalashtirilgan.
Izoh (0)