Chirchiq shahrining sobiq hokimi Davron Hidoyatov “O‘zavtosanoat” boshqaruvi raisi o‘rinbosari lavozimiga tayinlandi. Bu haqda “Daryo” manbasi xabar berdi.
13-mart kuni Toshkent viloyatining Chirchiq shahri hokimi Davron Hidoyatov lavozimidan ketgani to‘g‘risida xabar berilgandi. Uning o‘rniga Vazirlar Mahkamasida mas’ul vazifada ishlab kelgan Murodjon Abdurahimov tayinlangan edi.
Davron Hidoyatov 1976-yilda tug‘ilgan, Toshkent davlat iqtisodiyot universiteti va O‘zbekiston bank-moliya akademiyasi bitiruvchisi. 1996–2004-yillarda O‘zbekiston Markaziy banki tizimida, 2004–2005-yillarda “Osiyo-Invest Bank” (Moskva) boshqaruvi raisi lavozimida, 2005–2009-yillarda O‘zbekiston Markaziy banki tizimida ishlagan.
2009-yildan 2012-yilgacha GM Uzbekistan kompaniyasining moliya bo‘yicha ijrochi direktori, 2012-yildan 2014-yilgacha MAN Auto-Uzbekistan QK bosh direktori lavozimlarida faoliyat yuritgan. U prezidentning 2021-yil 30-yanvardagi farmoni bilan lavozimidan ozod etilgan Toshkent viloyati hokimi Rustam Xolmatovning o‘rniga viloyat hokimi vazifasini bajaruvchi etib tayinlangan edi.
O‘sha yili noyabr oyida esa viloyat hokimligidan olinib, Chirchiq shahri hokimi sifatida ish boshlagandi. Davron Hidoyatov o‘rniga Toshkent viloyati hokimi vazifasini bajaruvchi etib Qashqadaryoning sobiq hokimi Zoir Mirzayev tayinlangandi.
Izoh (0)