Fransiya Ukrainaga harbiy kontingent yuborish imkoniyatini hozircha ko‘rib chiqmayapti, dedi Fransiya prezidenti Emmanuel Makron Chexiyaning Novinky nashriga bergan intervyusida.
26-fevral kuni Makron Kiyevni qo‘llab-quvvatlash uchun Yevropa qo‘shinlari Ukrainaga kiritilishi mumkinligi haqida bayonot bergandi.
“Men har doim maqsadimizni aniq tushunib kelganman: biz rus xalqiga qarshi kurashayotganimiz yo‘q va biz eskalatsiyaga kirishdan bosh tortamiz”, — dedi Fransiya prezidenti.
Intervyuda Makron 26-fevral kuni o‘tkazilgan matbuot anjumanida Ukrainaga bo‘linmalarni yuborish haqidagi savolga bergan javobini tushuntirdi. Uning so‘zlariga ko‘ra, Makron “hech narsa istisno qilinmaydi” deb javob bergan.
“Bu biz yaqin kelajakda fransuz bo‘linmalarini Ukrainaga yuborishni ko‘rib chiqayotganimizni anglatmaydi, lekin biz muhokamani boshlayapmiz va Ukrainani, birinchi navbatda, Ukraina hududida qo‘llab-quvvatlash uchun qilinishi mumkin bo‘lgan hamma narsani ko‘rib chiqamiz”, — dedi Makron.
Uning so‘zlariga ko‘ra, yig‘ilish ishtirokchilari hamkorlikning besh yo‘nalishi bo‘yicha kelishib oldilar: kibermakonda mudofaani ta’minlash, Ukraina uchun harbiy texnikani birgalikda ishlab chiqarish, Ukrainani Belarus bilan chegaralarida qo‘llab-quvvatlash, minalardan tozalash bo‘yicha hamkorlik va eng zaif davlatlar xavfsizligini ta’minlash.
Izoh (0)