Germaniya, Fransiya va Polsha Ukrainaga yordam miqdorini oshirish niyatida, biroq bu davlatlar Rossiya bilan urush holatida ekanligini anglatmaydi, dedi Germaniya kansleri Olaf Shols.
“Biz Ukrainani qo‘llab-quvvatlaymiz, lekin biz Rossiya bilan urushmayapmiz. Biz hozir Ukrainaga qanday qilib ko‘proq yordam berishimiz mumkinligini muhokama qilmoqdamiz”, — dedi kansler.
Uning so‘zlariga ko‘ra, muzokaralarda uch davlat — Fransiya, Germaniya va Polsha rahbarlari Ukraina uchun xalqaro bozorlarda qurol sotib olishga va artilleriya yetkazib berish hajmini oshirishga kelishib olgan.
“Shuningdek, biz Rossiyaning Yevroittifoq hududida muzlatilgan aktivlaridan tushgan mablag‘dan foydalanib, Ukrainaga yordam berish uchun qurol sotib olishda foydalanmoqchimiz”, — deya qo‘shimcha qildi Shols.
Avvalroq Yevroparlament Yevropa Ittifoqining jinoiy kelib chiqqan aktivlarni musodara qilish bo‘yicha direktivasini ma’qullagandi. Bu Rossiyaning Ukrainaga hujumi sababli muzlatilgan mablag‘laridan Ukrainani tiklash uchun foydalanish imkonini beradi.
Izoh (0)